Bratıslavada qazaq tili kýrstary men qazaq ádebıeti kitaphanasy ashyldy
BRATISLAVA. KAZINFORM — Ulystyń uly kúni – áz-Naýryz meıramy qarsańynda Qazaqstannyń Slovakııadaǵy Elshiliginde tegin qazaq tili kýrstary men qazaq ádebıeti kitaphanasy ashyldy.
Sabaqtardy aptasyna eki ret bilikti mamandar – qazaq tili muǵalimi Jazıra Baıjumanova men fılolog Sultan Qamalıden júrgizedi. Qazaq tilin úırengisi keletinderdiń barlyǵyna yńǵaıly bolý úshin kýrstar eki topqa bólinedi – slovak jáne orys tilderinde oqytatyn toptar. Sabaqqa jeke qatysa almaıtyndar úshin sabaqtardyń onlaın translıatsııasy uıymdastyrylady. Qazaqstanda shyqqan qazaq tili oqýlyqtaryn elshilik qamtamasyz etedi.
Qazaqstannyń tarıhy men mádenıetimen tanysqysy keletinderdiń qaýymy úshin Qazaqstannyń Slovakııadaǵy Elshiligi janynan qazaq ádebıetiniń kitaphanasy ashyldy. Kitaphana qorynda hakim Abaı, Maǵjan Jumabaı, Muhtar Áýezov, Іlııas Esenberlın, Ábdijámil Nurpeıisov jáne basqa da qalamger klassıkterdiń qazaq, slovak, cheh, orys jáne aǵylshyn tilderindegi kitaptarynyń mol jınaǵy bar.
HH ǵasyrdyń ekinshi jartysynda Chehoslovakııada jaryq kórgen sırek kitaptar jınaǵy, onyń ishinde «Abaı joly» romany men «Qaraqypshaq Qobylandy» dastanynyń slovak aýdarmalary úlken qyzyǵýshylyq týdyrady. Elshilik kitaphanasynda qazaqtyń kórnekti táýelsizdik jolyndaǵy kúreskerleri Ahmet Baıtursynuly men Álıhan Bókeıhannyń tolyq shyǵarmalarynyń jınaqtary hám Alash qozǵalysynyń tarıhynan syr shertetin kitaptar erekshe oryn alady.
Oqýshylar men stýdentterdiń paıdalanýyna kitaphana qorynda tórt tomdyq «Qazaqstan tarıhy» oqýlyǵy, on tomdyq «Jyr marjany» qazaq halyq jáne tól poezııasynyń jınaǵy, sondaı-aq qazaq tili, mýzyka jáne beıneleý óneri boıynsha kitaptar bar. Kitaphana demalys kúnderin qospaǵanda, kún saıyn saǵat 9:00-den 15:00-ge deıin oqyrman qaýymyna ashyq. Oqyrmandardyń yńǵaılyǵy úshin elshiliktiń qorynda bar kitaptardyń tizimdemesi jasaqtaldy.
Bratıslavada qazaq tili kýrstary men qazaq ádebıeti kitaphanasynyń ashylýy Qazaqstan Respýblıkasy Syrtqy ister mınıstrligi men onyń sheteldegi mekemeleriniń qazaq dıasporasynyń mádenı, bilim berý jáne tildik qajettilikterin qanaǵattandyrý men shetelde Qazaqstanǵa qyzyǵýshylyqtyń artýyna baılanysty.
