Bratıslavada Abaı kitaptaryn Slovakııanyń iri ǵylymı kitaphanasyna tapsyrý rásimi ótti

BRATISLAVA. QazAqparat – Abaı Qunanbaıulynyń 178 jyldyǵy qarsańynda uly qazaq fılosofy, aqyny jáne aǵartýshysynyń kitaptaryn Slovakııa astanasynyń ýnıversıtettik kitaphanasyna syıǵa tartý rásimi ótti, dep habarlaıdy QazAqparat.

Kitaptardy tapsyrý rásimi barysynda Qazaqstan Respýblıkasynyń Elshisi Tólejan Barlybaev shyǵarmashylyǵy qulyqtylyq pen gýmanızm joǵary murattarynyń kamertonyna aınalǵan Abaı rýhanı murasynyń jahandyq mańyzyn atap ótti. HHІ ǵasyrda adamzat tap bolyp otyrǵan órkenıettik syn-qaterler aıasynda Abaı álemin zertteýdiń ózektiligi atap ótildi. Dıplomat Abaıdyń slovak jáne aǵylshyn tilderinde jaryq kórgen kitaptar jınaǵy oqyrmandardyń keń aýqymyn qyzyqtyratynyna senim bildirdi.

Bratıslava ýnıversıtetiniń kitaphanasy (ULB) – Slovakııadaǵy eń kóne, úlken jáne eń kóp baratyn kitaphananyń biri. 1919 jyly negizi qalanǵan ol uzaq ýaqyt boıy Slovakııanyń Ulttyq kitaphanasy bolyp, mekemeniń kitap qory 2,5 mıllıon basylymnan asty. Klassıkalyq basylymdardan basqa jınaqqa ǵylymı-zertteý eńbekteri men dıssertatsııalar, elektrondy qujattar, bıblıografııalyq maqalalar, ǵylymı dáıeksózder ındeks serııalar, sondaı-aq, merzimdi basylymdardyń 1100 ataýyn qamtıtyn PROQUEST derekqory kiredi.