Branko Peshıch týrnıri: Eki boksshymyz fınalǵa shyqty
ASTANA. KAZINFORM — Serbııa astanasy Belgradta ótip jatqan Branko Peshıch atyndaǵy dástúrli halyqaralyq týrnırdiń úshinshi kúni sharshy alańǵa shyqqan tórt boksshymyz jeńiske jetti.
Atap aıtsaq, 51 keli salmaqta el namysyn qorǵap jatqan Sanjar Táshkenbaı men Dáýlet Moldashev (54 kg) qarsylastarynan basym túsip, fınalǵa joldama aldy.
Al 92 keli salmaqta synǵa túsip jatqan Danııar Rahymberdınov pen asa aýyr salmaǵtaǵy otandasymyz Oljas Boqaev shırek fınaldaǵy jekpe-jekterinde jeńiske jetti.
Ókinishke qaraı, búgin 60 keli salmaqta judyryqtasqan jerlesimiz Bıbarys Jeksen armenııalyq Artýr Gagarıannan jeńilip qaldy.
Aıta keteıik, atalǵan týrnırde Qazaqstan quramasynan 12 boksshy el namysyn qorǵaýda. Jalpy, týrnırge álemniń 16 elinen 106 sportshy qatysyp jatyr. Jarys 17 naýryzǵa deıin jalǵasady. Búgin týrnırdiń tórtinshi kúni, jarysty segiz boksshymyz jalǵastyryp jatyr.
Esterińizde bolsa, keshe sharshy alańǵa shyqqan úsh qazaqstandyq boksshynyń bireýi jekpe-jekti jeńispen bastap, ekeýi jarys jolynan shyǵyp qaldy.
