Brakonerlikke qarsy is-sharada 93 qylmystyq is qozǵalyp, 39 mln teńgeden astam aıyppul salyndy

ASTANA. KAZINFORM – Tabıǵatty qorǵaý zańnamasyn buzǵan 4 myńnan astam derek anyqtalyp, onyń ishinde 93 qylmys boıynsha sotqa deıingi tergep-tekserý jumystary bastaldy. 

«Zań men tártip» ıdelogııasyn ilgerletý maqsatynda Іshki ister mınıstrligi 20 qazan — 19 qarasha aralyǵynda respýblıka boıynsha «Brakoner» jedel-profılaktıkalyq is-sharasyn ótkizdi.

Basty maqsat tabıǵatty qorǵaý zańnamalaryn saqtaý, brakonerlik jáne bıologııalyq resýrstar obektileriniń zańsyz aınalymyn anyqtaý jáne jolyn kesý.

Nátıjesinde tabıǵatty qorǵaý zańnamasyn buzǵan 4 myńnan astam derek anyqtalyp, onyń ishinde 93 qylmys boıynsha sotqa deıingi tergep-tekserý jumystary bastaldy.

— 25 qazanda Aqmola oblysynyń Egindikól aýdanynda avtokólikti tekserý barysynda 33 jabaıy qaz jáne ańshy qarýy tabylyp, tárkilendi. Kúdiktide ruqsat qujattary bolmaǵan. Bul derek boıynsha zańsyz ańshylyq baby boıynsha qylmystyq is qozǵaldy. 

Sonymen qatar 4 myńnan astam quqyq buzýshy ákimshilik jaýapkershilikke tartyldy, — delingen habarlamada. 

Atap aıtsaq: ańshylyq erejelerin buzǵany úshin — 2 myńnan astam, balyq aýlaý erejelerin buzǵany úshin — 627 jáne basqa quqyq buzýshylyqtar úshin — 685.

Jalpy 39 mln tengeden astam aıyppul salyndy. Іs-shara júrgizý barysynda 258 tekshe metr zańsyz daıyndalǵan aǵash, 4 tonnadan astam balyq, 255 dana kıik múıizi, 11,6 shaqyrym tyıym salynǵan aýlaý quraldary, odan basqa 358 dana ańshylyq qarýy, onyń ishinde ishki ister organdarynda tirkelmegen 120 qarý tárkilendi. 

Aıta ketelik Almaty oblysynda bir aıda brakonerlikke qatysty 11 qylmystyq is qozǵaldy.