Brakonerlikpen kúres: Jambyl oblysynda bir aıda 5 qylmystyq is qozǵaldy
TARAZ. QazAqparat – Jambyl oblysynda «Brakoner» jedel-aldyn alý sharasy ótkizilýde, dep habarlaıdy QazAqparat tilshisi.
Shara aıasynda aǵymdaǵy jyldyń 5-31 qazany aralyǵynda aımaqtyń florasy men faýnasyna qatysty brakonerlik áreketterdiń jolyn kesý úshin Jergilikti polıtsııa qyzmeti basqarmasynyń tabıǵatty qorǵaý bólinisteri keshendi is-sharalardy júzege asyrýda. Sondaı-aq osy maqsatta mobıldi izdestirý toptary qurylǵan. Bul týraly oblystyq Polıtsııa departamentiniń baspasóz qyzmetinen málim etti.
«Búgingi tańda 5 qylmystyq is qozǵalyp, 46 ákimshilik quqyqbuzýshylyq deregi anyqtaldy. Onda zańsyz ań aýlaý, sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan ósimdikter men janýarlar túrlerin, olardyń bólikterin nemese derıvattaryn zańsyz paıdalaný, jer qoınaýyn óz betimen paıdalaný faktileri tıirkelgen. Búginde bul qylmystyq isterge qatysty QR QK-niń 339-ynshy, 337-inshi, 334-inshi jáne 340-baptary boıynsha sotqa deıingi tergeý amaldary bastaldy», - delingen vedomstvo málimetinde.
Sondaı-aq, Jambyl oblysy Polıtsııa departamenti bastyǵynyń birinshi orynbasary Baýyrjan Údergenovtiń aıtýynsha, bul baǵyttaǵy jumys qalalyq jáne aýdandyq polıtsııa bólimderiniń basshylary tarapynan jandandyrýdy talap etedi. Óıtkeni oblys aýmaǵynda jergilikti mańyzy bar ańshylyq alqaptar men balyq sharýashylyǵynyń sý qoımalary jetkilikti.
