Brakonerlerdiń qolynan zardap shekken qoryqshy aýrýhanadan shyqty
KÓKShETAÝ. QazAqparat - Brakonerlerdiń qolynan zardap shekken «Ohotzooprom «ÓB» RMQK Ortalyq óńirlik fılıalynyń ınspektory Samat Ospanov aýrýhanadan saýyǵyp shyqty, dep habarlaıdy QazAqparat tilshisi.
«Naýqastyń jaǵdaıy qanaǵattanarlyq. Jarasy jazyldy. Soljaq qoly men ıyǵyn tolyq qozǵalta alady. Odan ári stantsıonarlyq kómekti qajet etpeıdi. Tek turǵylyqty mekenjaıy boıynsha emhanadaǵy hırýrgke kórinip turady», - dedi QazAqparat tilshisiniń saýalyna Aqmola oblystyq kópbeıindi aýrýhanasy bas dárigeriniń orynbasary Dmıtrıı Chaıkov.
Naýqas pen onyń áıeli oblystyq kópbeıindi aýrýhana, Jarqaıyń aýdandyq aýrýhanasynyń, sondaı-aq, sanavıatsııa qyzmetiniń dárigerleri men mamandaryna alǵystaryn bildirdi.
Aıta keteıik, osyǵan deıin habarlaǵanymyzdaı, 23-shi shildede shamamen saǵat 11.00-de «Ohotzooprom «ÓB» RMQK Ortalyq óńirlik fılıalynyń ınspektorlary Aqmola oblysy Jarqaıyń aýdanynda tabıǵatty qorǵaý zańnamasyn buzǵandarǵa qarsy kıik atý faktisin anyqtaıdy. Zań buzýshylardyń izine túsken eki ınspektorǵa qarsy oq atylyp, sonyń saldarynan 1976 jylǵy ınspektor kóz jumdy, al, onyń 1975 jylǵy áriptesi jaralanyp, Jarqaıyń aýdandyq aýrhanaǵa jatqyzylǵan edi.
Qaıtys bolǵan qoryqshynyń artynda tórt balasy – úsh qyzy men bir uly qaldy. QR Prezıdenti Qasym-Jomart Toqaev brakonerlerdiń qolynan qaza bolǵan «Ohotzooprom «ÓB» RMQK Ortalyq óńirlik fılıalynyń ınspektory Qanysh Nurtazınovtyń otbasyna kóńil aıtty.
Osy qylmysqa baılanysty arnaıy jedel-tergeý toby qurylyp, kúdiktilerdi ustaý boıynsha keshendi sharalar qolǵa alyndy. Kúdiktilerdi ustaýǵa Jarqaıyń, Esil jáne Jaqsy aýdandarynyń polıtsııa bóliminiń jeke quramy tartyldy. Patrýldik qyzmet narıadynan kúdiktilerdiń kóligine tuspaldaý berildi. Jarqaıyń jáne kórshi aýdandardyń aýmaǵynda 10 blok beket qoıylǵan bolatyn.
Artynsha, bul isti QR Іshki ister mınıstri men Aqmola oblystyq PD basshysy óz baqylaýyna aldy. Sonymen qatar, atalǵan oqıǵaǵa baılanysty QR QK 99 babynyń 1 bóligi boıynsha qylmystyq is qozǵalǵan bolatyn. Jedel izdestirý sharasy barysynda kúdiktiler Arqalyq qalasynyń 45 jastaǵy turǵyny men onyń 20 jastaǵy balasy ustaldy.
Keıin osy oqıǵadan qaza tapqan «Ohotzooprom» ÓB» RMQK ınspektory Qanysh Serikuly Nurtazınovqa QR Prezıdenti Qasym-Jomart Toqaev taǵaıyndaǵan memlekettik nagrada - qyzmet babynda eren erligi men janqııarlyǵy úshin I dárejeli «Aıbyn» ordeni, al, onyń áriptesi Samat Ospanovqa ІI dárejeli «Aıbyn» ordeni tapsyryldy.
