Brakonerlerdiń qolynan qaza tapqan ınspektordyń artynda tórt balasy qaldy
NUR-SULTAN. QazAqparat – QR Ekologııa, geologııa jáne tabıǵı resýrstar mınıstrligi brakonerler oǵynan jaraqat alǵan ınspektorlar týraly aqparat jarııalady, dep habarlaıdy QazAqparat.
«Nurtazınov Qanysh Serikuly 1976 jyly 24 qańtarda dúnıege kelgen. Ol – Qaraǵandy oblysy Ulytaý aýdanynyń Qoskól aýylynyń turǵyny. 2016 jyldyń 5 qańtarynda «Ohotzooprom «ÓB» RMQK jumysqa turǵan. Onyń artynda áıeli, úsh qyzy jáne 2011 jyly týǵan uly qaldy», - delingen mınıstrliktiń baspasóz qyzmetiniń habarlamasynda.
Qazirgi ýaqytta marqumnyń denesin týǵan aýylyna jetkizý máseleleri talqylanyp jatyr.
Mınıstrliktiń habarlaýynsha, jaraqat alǵan ekinshi ınspektor Ospanov Samat Kóshbergenuly 1975 jyly Aqmola oblysynda týǵan. Bilimi - ortasha-arnaýly, zańger. Qazirgi tańda Samatqa Derjavınsk aýdandyq aýrýhanasynda ota jasalýda.
Aıta keteıik, ınspektorlar Aqmola oblysy Jarqaıyń aýdanynda tabıǵatty qorǵaý zańnamasyn buzǵandardyń aldyn alý sharasyn júrgizgen jáne kıik atý faktisin anyqtaǵan. Zań buzýshylardyń izine túskende 10 óńirge – Qostanaı oblysyna tıesili aq tústi «Nıva» markaly avtokólikten (memlekettik nómiri belgisiz) oq atylyp, eki ınspektor jaraqat alǵan.
Aqmola oblysy Jarqaıyń aýdanynyń polıtsııa bólimi kúdiktilerdi izdep jatyr.
Eske sala ketsek, jyl basynda Qaraǵandy oblysy Nura aýdanynyń aýmaǵynda kıik atqan brakonerler eki ınspektordy jaralaǵan edi. Aýyr jaraqat alǵan Erlan Nurǵalıev 15 qańtarda Astananyń №1 aýrýhanasynda kóz jumdy.
