Brakonerlerden 21 tonna balyq tárkilenip, 20 mln teńgege jýyq aıyppul salyndy

ATYRAÝ. QazAqparat – Atyraý, Mańǵystaý jáne Batys Qazaqstan oblystarynyń sý aıdyndarynda eki aıǵa sozylǵan «Bekire-2022» balyq qorǵaý aktsııasy aıaqtaldy. Brakonerlerden 21 tonna balyq tárkilenip, 19,7 mln teńge aıyppul salyndy, dep habarlaıdy QazAqparat tilshisi.

Jaıyq-Kaspıı oblysaralyq basseındik balyq sharýashylyǵy ınspektsııasynyń qyzmetkerleri quqyq qorǵaý, tabıǵat qorǵaý organdarynyń jáne UQK Shekara qyzmetiniń ókilderimen birge tabıǵat qorǵaý zańnamasy buzylǵan 1231 derekti anyqtady. Balyq qorǵaý zańdylyǵyn buzǵan 895 adam ákimshilik jaýapkershilikke tartyldy. Sondaı-aq, 63 is sotqa joldanyp, brakonerlik deregimen 54 qylmystyq is qozǵaldy. Zań buzýshylarǵa jalpy somasy 19,7 mıllıon teńgeden astam aıyppul salynǵan.

«Zańsyz balyq aýlaýshylardan 21 tonna balyq tárkilendi. Onyń ishinde 1 852 keli bekire tuqymdas balyq túrleri, 755 gramm bekire tuqymdas balyq ýyldyryǵy bar. Sý aıdyndarynan 621 balyq aýlaý quraly, 140 sý kóligi alyndy», - deıdi Jaıyq-Kaspıı oblysaralyq balyq sharýashylyǵy ınspektsııasynyń bas mamany Temirhan Ońaıbaev.

Onyń aıtýynsha, kún saıyn ózen arnasy men teńiz akvatorııasy tekserilip, jalpy uzyndyǵy 22 shaqyrymǵa jeterlik 2 139 balyq aýlaý quraldary alyndy. Bul balyqtardyń ýyldyryq shashý ortasyna kedergisiz ótýine yqpal etken.

Eske sala ketelik, budan buryn Atyraý polıtseıleri brakonerlerden 500 keliden astam bekire tárkilegenin jazǵan edik.