Brakonerlerden 1 tonna bekire tárkilenip, 15 mln teńge aıyppul salyndy
Balyq sharýashylyǵy komıteti balyq resýrstaryn qorǵaý jáne balyq aýlaýdy retteý basqarmasynyń basshysy Erasyl Sýyqbaevtyń aıtýynsha, Jaıyq-Kaspıı sý aıdyndarynda «Bekire – 2023» keń aýqymdy balyq qorǵaý aktsııasy aıaqtaldy.
Aktsııa 1 sáýirde bastalyp, 31 mamyrǵa deıin sozyldy.
«Ekologııa jáne tabıǵı resýrstar, ishki ister mınıstrlikteri men Ulttyq qaýipsizdik komıtetiniń shekara qyzmetimen birlese ótkizilgen aktsııanyń maqsaty – bekire jáne basqa da balyq túrlerin saqtaý, ýyldyryq shashýy úshin qolaıly jaǵdaıdy qamtamasyz etý. Aktsııa kezinde Jaıyq-Kaspıı oblysaralyq basseındik balyq sharýashylyǵy ınspektsııasynyń ınspektorlary tabıǵat zańnamasyn buzýdyń 972 deregin anyqtady. Zań talabyn buzǵan 669 adam ákimshilik jaýapkershilikke tartyldy. Brakonerlikke, sırek kezdesetin jáne joıylyp ketý qaýpi tóngen balyq túrleriniń zańsyz aınalymyna qatysty 36 qylmystyq is qozǵaldy. Osyǵan baılanysty quqyq buzýshylarǵa 15,5 mln teńgeden astam aıyppul salyndy. Zańsyz aınalymnan 68 tonna 300 keli balyq, onyń ishinde 1001 keli bekire tuqymdas baǵaly balyq túrleri alyndy. Bekireniń 29 keli qara ýyldyryǵy tárkilendi. 295 balyq quraly, 76 sý kóligi men 13 avtomashına tárkilendi», -dep málim etti Erasyl Sýyqbaev.
Jaıyq ózeniniń arnasy men Kaspıı teńiziniń akvatorııasyn kúndelikti tazartý nátıjesinde sý aıdyndarynan uzyndyǵy 74 shaqyrymnan asatyn 743 zańsyz balyq aýlaý quraly tabylǵan.
Aktsııa kezinde Atyraý oblysynyń quqyq jáne tabıǵat qorǵaý organdary Isataı, Jylyoı, Qurmanǵazy aýdandaryndaǵy, Damby baǵyty men «Aqjaıyq» memlekettik tabıǵı rezervaty sekildi krımınogendik aımaqtarǵa basa nazar aýdarylǵan.
Eske sala ketelik, buǵan deıin Atyraý oblysynda brakonerlerden 770 keliden astam bekire tárkilengenin jazǵan edik.
