Brakonerler Jaıyq jaǵasyndaǵy qamysqa 36 kelige jýyq bekire jasyrǵan
Jaıyq-Kaspıı oblysaralyq balyq sharýashylyǵy basseındik ınspektsııasynyń ókili Oleg Týshkanovtyń aıtýynsha, elimiziń batysyndaǵy Atyraý, Mańǵystaý jáne Batys Qazaqstan oblysyndaǵy sý aıdyndarynda «Bekire-2023» respýblıkalyq balyq qorǵaý aktsııasy ótip jatyr. Bul aktsııa 31 mamyrǵa deıin jalǵasady.
«Balyq qorǵaý aktsııasynyń alǵashqy eki aptasynda quqyq qorǵaý organdarynyń qyzmetkerleri 244 zań buzýshylyqty anyqtady. Onyń ishinde Atyraý oblysynda – 167, Batys Qazaqstan oblysynda – 61, Mańǵystaý oblysynda 16 derek tirkeldi. Zań buzǵan 151 adam ákimshilik jaýapkershilikke tartyldy. Olarǵa jalpy somasy 3,3 mln teńgeniń aıyppuly salyndy. QR Qylmystyq kodeksiniń 335-babymen 6, al 339-babyna sáıkes 2 qylmystyq is qozǵaldy», - dep habarlady Oleg Týshkanov.
Onyń deregine súıensek, 9 sáýirde Damby balyq ınspektsııasy men Shekara qyzmetiniń qyzmetkerleri birlesken reıd ótkizgen. Reıd kezinde Jaıyq ózeniniń jaǵasy tekserilgen.
«Peshnoı» eldi mekeni tusyndaǵy qamys arasynan jalpy salmaǵy 35,9 keli 15 bekire tuqymdas balyq tabyldy. Baǵaly balyqtyń bári tárkilendi. Bul derekke qatysty sotqa deıingi tergep-tekserý júrgiziledi. Balyq resýrstaryna keltirilgen zalal – 18 mln 578 myń teńge», - dep málim etti Oleg Týshkanov.
Resmı ókildiń aıtýyna qaraǵanda, 1-13 sáýir aralyǵynda zańsyz aınalymnan 922 keli balyq alynǵan. Onyń ishinde 85,25 keli bekire tuqymdas balyq bar. Sondaı-aq, 178 balyq aýlaý, 17 júzý quraly men 3 avtokólik tárkilengen.
Eske sala ketelik, budan buryn Elimizdiń batysynda «Bekire» balyq qorǵaý aktsııasy bastalǵanyn jazǵan edik.
Keıin brakonerlerge qarsy «Bekire» aktsııasyna 1 200 qyzmetker tartylatynyn habarlaǵan bolatynbyz.
