Brakonerler qoıshyǵa 500 myń teńge berip, qylmystaryn soǵan artqan
Onyń aıtýynsha, brakonerler zańnan múldem qoryqpaıdy. Búgin bir qylmyskerge qatysty sot sheshimi shyqsa, erteń-aq ol brakoner kıikterdi aýlaýǵa qaıta shyǵady.
«Biz ony ustap aldyq. Al onyń mashınasynda sodan úsh kún buryn shyqqan sottyń sheshimi jatyr. Masqara ǵoı. Týra sol kólikte, týra sol jerde, týra sol atylǵan kıiktermen. Al sot úsh kún buryn bolǵan. Mine, brakonerlerdiń zańnan qalaı «qorqatynyn» osydan-aq kórýge bolady. Zańdy kúsheıtý kerek. Basqasyn alyp tastap, tek bas bostandyǵynan aıyrýdy ǵana qaldyrǵan durys. Sonda tártip bolady», - dedi E.Álzaqov Parlament Májilisinde ótken «dóńgelek ústelde».
Mekeme basshysynyń sózine qaraǵanda, bir rette ınspektorlar úsh brakonerdi ustaǵan. Bárin tárkilep, qylmyskerlerdi de, tıisti qujattardy Almaty oblysy Uıǵyr aýdandyq ishki ister departamentine tapsyrǵan.
«Sodan bastap bizdi kýáger retinde eshkim shaqyrǵan da joq. Qylmystyq istiń sotqa ketkenin bir-aq bildik. Al jaýapqa múldem bóten tórtinshi adam tartyldy. «Ol qalaı?» dedik. Prokýrorǵa da, sýdıaǵa ol adamnyń brakonerlikke esh qatysy joq ekenin jetkizdik. Qylmys jasaǵanda ony eshkim kórgen de joq. Sóıtsek, jergilikti qoıshy ma, baqtashy ma, oǵan 500 myń teńge bergen de, sotta jaýapkershilikti óz moınyńa alasyń degen. Sonda anaý úsheýi jazadan qutylyp ketti. Al qylmysqa esh qatysy joq adam jaýapqa tartyldy», - dep atap kórsetti E.Álzaqov.
Aıta keteıik, búgin QR Aýyl sharýashylyǵy mınıstrligi brakonerlermen kúres salasyndaǵy zańbuzýshylyqtardy jarııalady. Qylmyskerlerge quqyq qorǵaýshylar ǵana emes, saraptama jasaıtyn mamandar da kómektesip jatady. Sondaı-aq, mamandar ınspektorlardyń brakonerlerge oq atýǵa nege qorqatynyn túsindirdi.