Brakonerler ańshylyqqa el uıqyǵa ketkende shyǵady– qoryqshymen suhbat
QORǴALJYN. QazAqparat – Tabıǵat pen ony mekendeýshi jan-janýarlar men ań-qustardy qorǵaý qoryqshylardyń negizgi mindeti. Ol úshin adam boıynda batyldyq, shapshańdyq, qyraǵylyq jáne tez sheshim qabyldaý degen sekildi qasıetterdiń bolýy qajet. Osy qasıetterdi boıyna sińirgen, tabıǵat janashyrlarynyń biri Qorǵaljyn memlekettik tabıǵı qoryǵynyń ınspektory Sábıt Ermuqanov QazAqparat tilshisine óz jumysynyń ereksheligi týraly áńgimelep berdi.
«Meniń osy salaǵa kelgenime 2 jyl ǵana boldy. Jumysym ózime unaıdy, 15 kún istep, 15 demalamyz. Bizde árbir ınspektor men qoryqshynyń ózine tıesili aýmaǵy bar, sonyń tynyshtyǵy men bútindigine jaýap beredi. Ótken jylǵy Qaraǵandy oblysynda oryn alǵan qoryqshynyń ólimimen aıaqtalǵan oqıǵadan keıin shynyn aıtý kerek, brakonerlik aıtarlyqtaı azaıdy. Onyń ústine zań da kúsheıtildi. Degenmen biz qyraǵylyǵymyzdy báseńdetpeımiz. Kúni -túni qoryqty kúzetemiz. Ásirese, túnde jumys qyzady, óıtkeni brakonerler ańshylyqqa el uıqyǵa ketkende shyǵady. Sondyqtan biz árdaıym saq ári daıyn bolýymyz qajet», - dedi S. Ermuqanov.
Sondaı-aq, qoryqshy osy salaǵa qalaı kelgeni týraly aıtyp berdi.
«Negizgi mamandyǵym boıynsha zańgermin. Biraz jyldar elordadaǵy Halyqqa qyzmet etý ortalyǵynda jumys istedim. Odan keıin jeke fırmada qyzmet ettim. Bul salaǵa aıaq astynan keldim desem de bolady. Maǵan tanysym 15 kún istep, 15 kún demalatyn jumys bar, biraq dalalyq jerde dep usynys bildirdi. Men basynda vahtalyq kúzetshi qyzmeti shyǵar dep oıladym. Sodan soń kóreıik dep, birneshe kún synaq merziminen ótýge bel býdym. Shynymdy aıtsam, jumys alǵashqy kúnnen birden unady. Keń dala, taza tabıǵat jáne jan-janýarlar osynyń bárin kórgen soń, osy salada eńbek etemin degen sheshim qabyldadym. Belgilengen synaq merziminen sátti ótip, 2 jyldan astam eńbek etip kelemin. Kóp tanystarym meni túsinbeı tań qaldy, qalada jumysyń bar, aıdalada ne isteısiń degen sekildi, biraq bul meniń qalaýym. Qalanyń jumysyn, dala jumysyna aýystyrǵanyma esh ókinbeımin», - deıdi ol.
Odan bólek qoryqshy mamanǵa qoıylatyn negizgi talaptarmen de tanystyryp ótti.
«Bizge aldymen osy salaǵa qatysty bilimniń bolýyn talap etedi, sonymen qatar dala men sol jergilikti mekendi tereń bilý mindeti qoıylady. Odan bólek, biz úshin adammen qarym-qatynas jasap, til tabysa bilý qasıeti artyq etpeıdi. Sebebi zań buzýshyny ustaǵan jaǵdaıda biz onyń kim ekenin, qandaı oıy baryn bilmeımiz, sondyqtan onymen maman retinde sóılesip, máseleni ońtaıly sheshken jón», - dedi qoryqshy.
Buǵan deıin Qorǵaljyn memlekettik tabıǵı qoryǵynda kıik sanynyń úsh esege deıin óskeni týraly habarlaǵan bolatynbyz.
