«Brakoner» jedel aldyn alý sharasy bastalǵannan beri 6 zań buzýshy ákimshilik jaýapkershilikke tartyldy - Astana qalasy ІІD
ASTANA. Qazannyń 27-si. QazAqparat - «Brakoner» jedel aldyn alý is-sharasy bastalǵannan beri elordada tabıǵatty qorǵaý zańnamasynyń buzylǵandyǵy týraly 7 derek tirkelip,
6 zań buzýshy ákimshilik jaýapkershilikke tartyldy. Bul aqparatty Astana qalalyq ІІD-niń baspasóz qyzmeti taratyp otyr.
«Aǵymdaǵy jylǵy qazannyń 23-inde shamamen saǵat 11-lerde, Kúıgenjar aýylynyń tusynda Esil ózenine ruqsat qaǵazynsyz aý salǵan sol eldi mekenniń esh jerde jumys istemeıtin 1971 jyly dúnıege kelgen azamaty QR Ákimshilik quqyq buzýshylyq týraly kodeksiniń 298-1 babyn buzǵany úshin ustaldy. Balyq aýlaıtyn qural tárkilendi. Ustalǵan azamatqa 3 AEK kóleminde aıyppul salyndy», - delingen habarlamada.
Sonymen qatar osy kúni Qorǵaljyn tas joly boıynda 40 jastaǵy azamat júrgizip kele jatqan «Toıota-Rýnner» avtomobıli toqtatylyp, kólikten IJ12 kalıbrli ańshy myltyǵy alyndy. Sondaı-aq kólikti tintý barysynda ruqsat qaǵazynsyz atyp alynǵan 7 úırek tabyldy. Ustalǵan azamat ákimshilik jaýapkershilikke tartylyp, 6 AEK kóleminde aıyppul tóleıtin boldy.
Esterińizge sala keteıik, qazannyń 23-31-i aralyǵynda Astana aýmaǵynda «Brakoner» respýblıkalyq jedel aldyn alý sharasy ótýde.
