Brakoner qoıdiki dep boı bermeı qoıǵan et saraptamaǵa jiberildi
PETROPAVL. QazAqparat – Soltústik Qazaqstan oblysynda er adamnyń kóliginen ańshy qarýy, patrondar men ańnyń soıylǵan eti tabyldy, dep habarlaıdy QazAqparat tilshisi oblystyq Polıtsııa departamentiniń baspasóz qyzmetine silteme jasap.
Ustalǵan ýaqytta Petropavl qalasynyń 36 jastaǵy turǵyny soıylǵan – qoıdyń eti dep boı bermeı qoıǵan kórinedi. Tabıǵat qorǵaýshylar men Maǵjan Jumabaev aýdanynyń ýchaskelik polıtsııa qyzmetkerleri onyń sózine senbeı, etti saraptamaǵa jibergen. Saraptama qorytyndysyna saı, protsessýaldyq sheshim qabyldanady. Fakt sotqa deıingi tergeý amaldarynyń biryńǵaı reestrine «Zańsyz ań aýlaý» retinde tirkeldi.
«Tuıaqty janýarlardy – bulan, qaban, maral, sibir eligin 1 qańtardan bastap aýlaýǵa bolmaıdy. 15 aqpanǵa deıin mamyq júndi ańdardy – túlki, qarsaq, qoıan, janat tárizdi ıt pen ondatrdy aýlaýǵa ruqsat bar. Osy aralyqta ekologııalyq qylmystar men ákimshilik quqyqbuzýshylyqtardyń aldyn alýǵa, ashýǵa erekshe mańyz beriledi», - deıdi tabıǵat qorǵaý polıtsııasy tobynyń bastyǵy mindetin atqarýshy Ashat Qojabaev.
