Bir jylda ult taǵdyryna yqpal etetin mańyzdy oqıǵalar boldy — Prezıdent
ASTANA. KAZINFORM — Memleket basshysy Qasym-Jomart Toqaev Qazaqstan Halyq Keńesiniń birinshi sessııasynda bir jylda Qazaqstanda eldiń saıası júıesi men memlekettik basqarýyna eleýli ózgeris ákelgen aýqymdy reformalar júzege asqanyn aıtty.
— Konstıtýtsııa halqymyzdyń máńgilik temirqazyǵy jáne Ádiletti, Ozyq, Taza Qazaqstannyń myzǵymas arqaýy retinde elimizdi jarqyn keleshekke aparatyny sózsiz. Konstıtýtsııalyq reforma nátıjesinde biz elimizdiń zań shyǵarýshy organy — Quryltaıdyń alǵashqy saılaýyn ótkizdik. Sheteldik sarapshylardyń paıymdaýy boıynsha saılaý joǵary deńgeıde, minsiz ótti, — dep atap ótti Qasym-Jomart Toqaev.
Halyq qoldaǵan Quryltaıǵa bes partııa kirdi. 28 tamyz kúni depýtattar óz jumysyna kiristi.
Úkimettiń jańartylǵan quramy jasaqtaldy. Vıtse-prezıdent taǵaıyndaldy. Jańa memlekettik mekeme — Qazaqstan Respýblıkasy Qaýipsizdik Keńesiniń apparaty quryldy.
— Mine, búgin Qazaqstan Halyq Keńesi de óz qyzmetin bastap otyr. Osy tarıhı oqıǵanyń mán-maǵynasyn eshqashan jadymyzdan shyǵarmaıyq. Túptep kelgende, bir jyldyń ishinde ult taǵdyryna tikeleı yqpal etetin asa mańyzdy oqıǵalar boldy. Biz az ǵana ýaqytta tutas memleket pen búkil qoǵamnyń sıpatyn ózgertken asa aýqymdy reformalardy sapaly júzege asyrdyq. Al qazirgi tańda bul — órkenıetti, jasampaz jáne eń bastysy birtutas ulttyń ǵana qolynan keletin is dep ashyq túrde aıtýǵa bolady, — dedi Memleket basshysy.
Aıta keteıik, Astanada Qazaqstan Halyq Keńesiniń birinshi sessııasy bastaldy. Keńeske qabyldanǵan 126 ókil jáne Quryltaı depýtattary Táýelsizdik saraıyna jınaldy.
