Bir jylda sýyq sýdyń tarıfi 88,4 paıyz ósken

ASTANA. KAZINFORM – Naýryz aıynda el boıynsha turǵyn úıdi jalǵa alý tólemi jyldyq mánde 14,9%,  jańa jeńil kólik baǵasy 21,6%, kartop baǵasy 66,4%, sýyq sý tarıfi 88,4 paıyz ósken. Bul  týraly Ulttyq statıstıka bıýrosynyń naýryz aıyndaǵy baǵalar týraly resmı málimetinde aıtylǵan.

Resmı statıstıka boıynsha, naýryzdaǵy ınflıatsııa 2024 jyldyń naýryzyndaǵy kórsetkishten 10 paıyz joǵary bolǵan. Onyń ishinde aqyly qyzmetterdiń baǵasy bir jylda 14,3%, azyq-túlik emes taýarlar quny 9,1%, azyq-túlik taýarlardyń baǵasy 7,6% ósken.

Tarıfterdiń ishinde ásirese sýyq sýmen jabdyqtaý quny qatty kóterilgen – bir jylda 88,4%. Sondaı-aq sý burý tarıfi 23,7%, ortalyqtan jylytý tarıfi 19%, ystyq sý tarıfi 14,6%, elektr tarıfi 14,3%, turmystyq gazdy qubyr arqyly taratý tarıfi 13,3%, qoqys shyǵarý tarıfi 11,1%, turǵyn úıdi kútip ustaýǵa jumsalǵan tólem 11% ósken.

Baılanys qyzmetteriniń baǵasy 13,9%, densaýlyq saqtaý qyzmetteriniń baǵasy 13,4%, kólikke tehnıkalyq qyzmet kórsetý jáne jóndeý baǵasy 12,9%, shashtarazdardaǵy baǵa 12,6%, qoǵamdyq orynda tamaqtaný quny 11,3% artqan. Al temir jol bıleti 23,6%, qalalyq avtobýspen qatynaý 11,2%, ushaq bıleti 10% qymbattaǵan. Turǵyn úıdi jalǵa alý tólemi 14,9% ósken.

Al zergerlik buıymdar men saǵattar 26,6%, jańa jeńil avtomobıl 21,6%, kilem 13,9%, kıim men aıaq kıim 10,9%, jıhaz 10%, ballonǵa quıylǵan suıytylǵan gaz 23%, aǵash 14,8% qymbattaǵan.

Azyq-túliktiń ishinde kartop eń qatty qymbattaǵan – 66,4%.

Sonymen qatar pııaz baǵasy 32,2%, qyryqqabat baǵasy 27,3%, mıneraldy jáne aýyz sý baǵasy 17,1%, kúnbaǵys maıynyń quny 16,8%, kondıterlik ónimder baǵasy 15%, qyzanaq baǵasy 14,9%, banan baǵasy 14,6%, alkogoldi ishimdikter men temeki ónimderiniń baǵasy 13%, sary maı baǵasy 12,2%, jemis jáne kókónis shyryndarynyń baǵasy 11,4%, sıyr etiniń baǵasy 11,2%, balyq jáne teńiz ónimderiniń baǵasy 10,6% ósken.

Byltyrǵy naýryzdan beri tek qaraqumyq jarmasy 17,7%, jumyrtqa 8,3%, sábiz 7,4%, kúrish 6,3% arzandaǵan.

Eske salsaq, jýyrda ǵana Dúnıejúzilik bank Qazaqstannyń ekonomıkalyq belsendiligi 2025 jyldyń basynda senimdi ósim kórsetkenimen, ınflıatsııa táýekeli saqtalatynyn málim etken edi.