Bir jylda Ózbekstannyń sý qory 6,5 mlrd tekshe metrge azaıdy
TAShKENT. KAZINFORM – Zań shyǵarý palatasynyń otyrysyna qatysqan Ózbekstannyń Sý sharýashylyǵy mınıstri Shavkat Hamraev depýtattarǵa sý resýrstaryn basqarý jáne atalǵan sektordaǵy túıtkilder týraly esep berdi, dep habarlaıdy Kazinform agenttiginiń menshikti tilshisi.
Mınıstr atap ótkendeı, keıingi jyldary óńirde sý tapshylyǵy asa ózekti máselege aınalyp bara jatyr. Onyń dereginshe, bıyl Ózbekstanda aýyl sharýashylyǵy salasyna 40 mlrd tekshe metrden astam sý baǵyttalǵan.
— Alaıda búginde transshekaralyq sý qoımalaryn qosa alǵanda, bizdiń sý qorymyz 2024 jylmen salystyrǵanda 6,5 mlrd tekshe metrge azaıdy. Іshki sý qoımalarynda 2,7 mlrd tekshe metrge kem sý jınaldy, — dep málim etti Shavkat Hamraev.
Ol sý únemdeý tehnologııalaryn keńinen engizý arqyly bul máseleni ishinara sheshýge bolatynyn atap ótti. Keıingi 5 jylda Ózbekstanda sýdy paıdalaný tıimdiligin arttyrý maqsatyndaǵy jobalarǵa 60 trln sým bıýdjet qarajaty men 622 mln dollar sheteldik ınvestıtsııa jumsalǵan.
Tıisinshe, bıyl sýarmaly alqaptardyń 60%-ǵa jýyǵyna sý únemdeý tehnologııalary engizilgen. Atalǵan jumystardy jalǵastyrý úshin sý resýrstaryn basqarý jáne ırrıgatsııalyq sektordy damytýdyń 2025-2028 jyldarǵa arnalǵan baǵdarlamasy bekitildi.
Eske salaıyq, buǵan deıin ózbekstandyq sarapshy Tahır Madjıtov Ortalyq Azııadaǵy eń iri «Fedchenko» muzdyǵynyń 40%-ǵa jýyǵy erip ketkenin aıtyp edi.
Sondaı-aq, BUU-nyń zertteýine sáıkes, Ortalyq Azııadaǵy sý tapshylyǵy óńirdiń ekonomıkalyq ósimin tejeıdi. Taıaýda Kazinform agenttigine suhbat bergen sarapshy Dınara Zıganshına Ortalyq Azııadaǵy sý tapshylyǵy máselesin tek syndarly dıalog arqyly sheshýge bolatynyn aıtty.
Buǵan deıin habarlaǵanymyzdaı, Halyqaralyq tabıǵatty qorǵaý odaǵy Ortalyq Azııadaǵy sý dıplomatııasyn damytýǵa nıetti.
Sonymen qatar Ortalyq Azııa men Aýǵanstan sý sharýashylyǵy salasyndaǵy yntymaqtastyqty nyǵaıtýǵa múddeli.
Bıyl sáýirde Ózbekstannyń Sý sharýashylyǵy mınıstri Shavkat Hamraev Kazinform agenttiginiń menshikti tilshisine suhbat berip, Qazaqstanmen yntymaqtastyqty nyǵaıtýǵa múddeli ekenin málimdegen edi.