Bir jylda Qazaqstan men Qytaı áýe qatynasy 18 reıske kóbeıgen

ASTANA. KAZINFORM – Qazaqstan Ortalyq Azııa elderiniń barlyǵymen derlik áýe baılanysyn ornatqan. Bul týraly QR Kólik mınıstrligi Azamattyq avıatsııa komıteti tóraǵasynyń orynbasary Darhan Katyshev aıtty.

Onyń aıtýynsha, 2024 jyly qazaqstandyq áýekompanııalar 15 mıllıonǵa jýyq jolaýshy tasymaldaǵan. Onyń ishinde 55% – ishki reıster bolsa, 45% – halyqaralyq reıster. Bul kórsetkishter jyl saıyn ósip jatyr. 

Jalpy Qazaqstanda tórt iri áýe kompanııa bar: Air Astana, Fly Arystan, Scat jáne VietJet Air. Olardyń barlyǵy halyqaralyq reısterdi oryndaıdy. 

– Byltyr Qytaımen 60 reıs bolsa, qazirgi ýaqytta 78 reıs ushady, 18 reıske kóbeıgen. Túrkııamen, Arab elderimen reıster artyp keledi, Ortalyq Azııa elderiniń barlyǵymen derlik áýe baılanysy ornaǵan. Ózbekstanmen aptasyna 51 reıs bolsa, Qyrǵyzstanmen – 16-18, reıs, Tájikstanmen – 8-9 reıs ushady, – dedi Darhan Katyshev elordada «Ortalyq Azııa + Qytaı» avıatsııa máseleleri jónindegi yntymaqtastyq jumys tobynyń konferentsııasynda. 

Sonymen birge, Prezıdent tapsyrmasymen 6 óńirde – Astana, Almaty, Aqtóbe, Qaraǵandy, Shymkent, Aqtaý áýejaılaryn aerohab retinde damytý jumystary qolǵa alynǵan. Onyń ishinde Almaty men Astana áýejaılaryn sheteldik ınvestorlar basqaryp, damytýǵa mol qarajat bólip otyr. 

Aıta keteıik, byltyr «Ortalyq Azııa – Qytaı» (C5+1) azamattyq avıatsııa salasyndaǵy yntymaqtastyq jumys tobynyń alǵashqy konferentsııasy Qytaıdyń Sıan qalasynda ótken edi. Búgin ekinshi konferentsııa Qazaqstan astanasynda bastaldy. 

Buǵan deıin Darhan Katyshev aldaǵy ýaqytta Qazaqstannan qaı qalalarǵa áýe reısi ashylatynyn aıtyp bergen edi.