Bir jylda baspanany jalǵa alý quny qalaı ózgerdi

ASTANA. KAZINFORM — Qazaqstanda abattandyrylǵan turǵyn úıdi jalǵa berý quny 1 sharshy metr úshin orta eseppen 5024 teńgege jetti. Sońǵy segiz aıda baǵa 10,2 paıyzǵa ósken.

Ulttyq statıstıka bıýrosynyń dereginshe, 2024 jylǵy jeltoqsannan beri respýblıka boıynsha jalǵa alý aqysy 13,1 paıyzǵa qymbattaǵan. Alaıda jekelegen óńirlerde ósim ortasha respýblıkalyq deńgeıden edáýir joǵary tirkelgen.

Atap aıtqanda, Pavlodarda jaldamaly turǵyn úı baǵasy bir jylda 42,9 paıyzǵa, Petropavlda 40,9 paıyzǵa artqan. Aqtóbede ósim 30,4 paıyzdy qurasa, Óskemende jalǵa alý aqysy 23,1 paıyzǵa qymbattaǵan.

Megapolısterdegi dınamıka

2025 jylǵy sáýir men jeltoqsan aralyǵynda eldiń iri qalalarynda jaldamaly turǵyn úı baǵasy birqalypty ósken. Statıstıkaǵa sáıkes, respýblıka boıynsha 1 sharshy metrdiń ortasha quny 4558 teńgeden 5024 teńgege deıin qymbatttady.

Osy kezeńde Astanada jalǵa alý aqysy 5005 teńgeden 5551 teńgege jetip, 10,9 paıyzǵa ósken. Almatyda baǵa 5437 teńgeden 5965 teńgege deıin, al Shymkentte jaldamaly turǵyn úı quny 3917 teńgeden 4252 teńgege kóterilgen.

Qazirgi tańda el boıynsha eń joǵary jalǵa alý baǵasy Almaty men Astanada saqtalyp otyr. Al oblys ortalyqtarynyń ishinde eń tómen kórsetkish Taraz qalasynda tirkelgen. Munda 1 sharshy metrdiń ortasha quny 2401 teńgeni quraıdy.

Bes jyldaǵy ósim

Bıýro málimetinshe, sońǵy bes jylda jaldamaly turǵyn úı naryǵynda aıtarlyqtaı baǵa ósimi baıqalady. 2020 jylǵy jeltoqsanmen salystyrǵanda, respýblıka boıynsha jalǵa alý aqysy eki eseden asa ósken.

— Almatyda sońǵy bes jylda baǵa 2,6 ese artsa, Qaraǵandyda 2,5 ese, Astanada 2,3 ese qymbattaǵan. Tek 2025 jyldyń tórtinshi toqsanynyń ózinde jaldaý quny aldyńǵy toqsanmen salystyrǵanda 6 paıyzǵa ósti, — dep kórsetilgen derekte.

Aıta keteıik, buǵan deıin 2026 jyly turǵyn úı naryǵyndaǵy baǵa qalaı ózgeretinin jazǵan edik.