Byltyr 9 myńǵa jýyq adam soltústikke qonys aýdarǵan
ASTANA. KAZINFORM — Byltyr 8 903 adam óz erkimen soltústikke qonys aýdardy. Onyń ishinde qonys aýdarýshylar — 6 492, qandastar — 2337 adam. Bárine memlekettik qoldaý sharalary kórsetildi.
Eńbek kúshi tapshy óńirlerge qonys aýdarý múmkindigin paıdalanǵan qazaqstandyqtar óz ómirindegi oń ózgeristerdi atap ótti.
Sonyń biri — Quralaı Masatbaeva. Ol otbasymen 2021 jyly Astanadan Soltústik Qazaqstan oblysynyń Taıynsha qalasyna kóship keldi.
«Kóshkennen keıin otbasymyzǵa 612 570 teńge somasynda kóshýge materıaldyq kómek berildi, sondaı-aq bizge qaladan memlekettik jalǵa beriletin turǵyn úı berildi», — deıdi ol.
Quralaı Masatbaevanyń «Bastapqy áskerı daıyndyq» mamandyǵy boıynsha joǵary bilimi bar.
Ótken jyly 1 mln 380 myń teńge somasyna memlekettik grant alyp, shaǵyn kondıterlik dúkenin ashty.
«Dekrettik demalysta úıde óz isimdi ashýdy, balalardyń qasynda bolýdy armandaıtynmyn. Taıynsha aýdanynyń jumyspen qamtý ortalyǵyna baryp, qaıtarymsyz grant týraly bildim. Qonys aýdarýshy bolǵandyqtan qaıtarymsyz grant beriletinder sanatyna kiretinimdi aıtyp, barlyq suraqtar boıynsha keńes berildi. Osyndaı múmkindikti bos jibermeı, ózimniń bıznes-josparymdy qorǵap, memleketten grant aldym», — dep bólisti kásipker kelinshek.
Ulttyq joba aıasyndaǵy memlekettik qoldaý sharalary:
- kóshýge arnalǵan sýbsıdııa –otaǵasyna jáne otbasynyń árbir múshesine 70 AEK mólsherinde birjolǵy kómek;
- otbasy músheleriniń sany men eldi mekenge baılanysty 15-ten 30 AEK-ke deıingi mólsherde 12 aı ishinde turǵyn úı jaldaýǵa jáne kommýnaldyq qyzmetterge aqy tóleýge aı saıynǵy sýbsıdııalaý;
- qysqa merzimdi kásiptik oqytýǵa jiberý;
- jumysqa ornalasýǵa nemese kásipkerlik bastamany damytýǵa járdemdesý;
- Ekonomıkalyq utqyrlyq sertıfıkattaryn berý.
Budan basqa, óńiraralyq qonys aýdarýǵa járdem kórsetetin jumys berýshilerge turǵyn úımen qamtamasyz etilgen jáne keminde 2 jyl merzimge turaqty jumysqa qabyldanǵan árbir qyzmetker úshin 400 AEK mólsherinde jumysqa ornalasýǵa birjolǵy sýbsıdııa beriledi.
Ótken jyly barlyq qonys aýdarǵandardyń ishinde 4 158 adam eńbekke jaramdy, onyń 3 079-y turaqty jumysqa ornalastyrylǵan, 164 adam kásipkerlik qyzmetpen aınalyssa, 35 adam bıznes ashýǵa grant aldy.
