Bir jylda 200-den astam múgedektigi bar balanyń armanyn oryndaǵan ustaz «Shapaǵat» medalimen marapattaldy
Bir jyl ishinde 200-den astam múgedektigi bar balalardyń armanyn oryndaǵan túrkistandyq ustaz «Shapaǵat» medalimen marapattaldy, dep habarlaıdy Kazinform.
Túrkistan qalasynyń turǵyny Ásel Bımyrzaeva ótken jyldan beri «Meniń armanym» atty jobany júzege asyryp keledi.
Qaladaǵy mektepte muǵalim bolyp qyzmet atqaratyn ol ár aıda úıden oqıtyn múgedektigi bar 10 balanyń armanyn oryndap, qýanyshqa keneltip otyr.
Ótken jyldan beri uıymdastyrylyp kele jatqan ıgi is barysynda Ásel Mahanbetqyzy óńirdegi 247 balanyń kishigirim armanyn oryndady.
«Meniń ulym da 4-synypqa deıin úıde oqydy. Qazir emdetip, jaǵdaıyn túzep aldyq. Sondaı-aq ózim ustaz bolǵandyqtan úıde oqıtyn balalarǵa sabaq beremin. Arasynda ártúrli balalar bar. Bireýi júre almaıdy, biri sóıleı almaıdy. Tipti tósekten tura almaıtyndar da bar. Jaǵdaıyn kórip janym ashıdy, jylaǵym keledi. Sabaqtan tys ýaqytta qasynda qalyp, kóp sóılesemin. Olarmen syrlasyp, arman-maqsattaryn tyńdaımyn. Sodan taǵdyrdyń synaǵyna túsken balalardyń az da bolsa kóńilin kóterip, qýantqym keldi», - deıdi joba jetekshisi.
Ásel Bımyrzaeva Túrkistan qalasyndaǵy Atatúrik atyndaǵy №17 mektepte orys tili páninen sabaq beredi.
Bos ýaqytynda qoǵamdyq istermen aınalysady. Ózi qolǵa alǵan jobasy aıasyndaǵy jumystardy úılestirip otyrady.
«Eń aldymen, balalarǵa armanyn jazdyramyn. Qoly ıkemge kelmeıtinderine ata-anasy kómektesedi. Bala armany jazylǵan qaǵazdy konvertke salyp, demeýshilerge tapsyramyn. Sodan bir kúndi belgilep, syılyqty tapsyramyz», - deıdi ol.
Respýblıka kúnine oraı joba jetekshisi Ásel Bımyrzaeva «Shapaǵat» medalimen marapattaldy.
Túrkistan qalasynda ótken saltanatty jıynda oblys ákimi Darhan Satybaldy kóptegen ıgi iske uıytqy bolǵan qaıyrymdy qyzǵa memlekettik marapatty tabys etti.
«Bul meniń ǵana emes, jobaǵa qatysýshy barlyq jandardyń marapaty dep bilemin. Balalarǵa qýanysh syılaý basty maqsatym. Sondyqtan jobany aldaǵy ýaqyttyda joǵary deńgeıde uıymdasyryp, jalǵastyra beremiz. Eńbegimizdi joǵary baǵalaǵan Memleket basshysyna, oblys ákimine rahmet»,-deıdi ustaz.
Jalpy Túrkistan qalasynda 1 myńnan astam erekshe bala bar.
Joba jetekshisiniń aıtýynsha, olardyń armanyn oryndaýda túrli sala basshylary men kásipkerler, qoǵam belsendileri men úkimettik emes uıym ókilderi, ujymdar jaqsylyq jasaýda jarysyp jatqan jaıy bar.
Máselen, alǵashqyda tek Túrkistan qalasynyń tóńireginde ótken qaıyrymdylyq is sharasy qazirgi kezde oblys aýmaǵyndaǵy aýdan, qalalarda jalǵasyp jatyr.
Bastamashyl toptyń usynysyna qoldaý bildiretin kásipkerler de kóbeıgen.
