Bir jyl ishinde Pavlodar oblysynda ınternet-alaıaqtyq 43%-ǵa kóbeıgen

PAVLODAR. KAZINFORM – Alǵashqy jeti aıda oblysta alaıaqtyqqa qatysty 1 208 derek tirkelgen. Al ınternet – alaıaqtyq sıpatyndaǵy qylmystardy ashý úlesi nebári – 17,5%. 

QR Bas Prokýratýrasy Quqyqtyq statıstıka jáne arnaıy esepke alý jónindegi komıtetiniń Pavlodar oblysy boıynsha departamenti Ertis-Baıan óńiri elimizdegi ınternet-alaıaqtyq deńgeıi joǵary bes aımaqtyń qataryna kiretinin málim etti. 

– Almaty men Astana qalalary, sondaı-aq Qaraǵandy men Almaty oblystarynan keıingi orynda bizdiń aımaq tur. Alǵashqy jeti aıda oblysta alaıaqtyqqa qatysty 1 208 derek tirkelgen. Ótken jyldyń sáıkes kezeńinde bul kórsetkish 842 bolǵan, ıaǵnı ósim 43%-dan asady. Alaıaqtardyń áreketinen kelgen jalpy materıaldyq shyǵyn 164 mln teńgeni qurady, onyń tek 12 mln teńgesi ǵana ótelgen, - dep habarlady departamentten. 

Alaıaqtyq oqıǵalarynyń eń kóp ósýi Pavlodar qalasynda jáne Tereńkól, Ýspen aýdandarynda baıqalǵan. Al Aqqýly, Aqtoǵaı jáne Sharbaqty sııaqty aýdandarda kerisinshe tómendegen.

Quqyqtyq statıstıka departamentiniń málimetine sáıkes, tirkelgen alaıaqtyqtardyń basym bóligi (86,3%) ınternet arqyly jasalǵan. Alaıaqtyq qylmystardyń ashylý kórsetkishi nebári – 28,1%, al ınternet-alaıaqtyqtar boıynsha – 17,5% deńgeıinde. Alaıaqtardyń qurbandary kóbine 60 jastan asqan azamattardy quraıdy (jábirlenýshilerdiń 25,9%-y).

Prokýratýra ókilderiniń aıtýynsha, alaıaqtyqtardyń ósýiniń birneshe negizgi sebepteri bar. Bul – qyzmet kórsetý, saýda jáne qarjy salalaryndaǵy tsıfrlandyrýdyń jappaı ósýi, egde jastaǵy azamattar arasyndaǵy tsıfrlyq saýattylyqtyń jetkiliksizdigi, sondaı-aq bul saladaǵy qylmystardy tergeýdiń kúrdeliligi.

Atalǵan máselemen kúresý úshin prokýrorlar onlaın-platformalarda paıdalanýshylardy mindetti túrde ıdentıfıkatsııalaýdy, kúmándi operatsııalardy baqylaý tetikterin engizýdi, nesıeler berýge baqylaýdy kúsheıtýdi, sondaı-aq azamattardyń asa saq bolýyn eske salady.

Eske sala keteıik, 50-den asqan adamdar ınternet alaıaqtaryna jıi aldanady.