Bir jyl ishinde kolledjder men bıznes arasyndaǵy kelisimder sany 8 esege artty
ASTANA. KAZINFORM — Memleket basshysy jarııalaǵan Jumysshy mamandyqtar jyly aıasynda tehnıkalyq jáne kásiptik bilim berý júıesi aıtarlyqtaı alǵa qadam basty. Transformatsııanyń negizgi tetikteriniń biri – kolledjderge kásiporyndardyń sheftik qoldaý kórsetýi boldy. Bul týraly Oqý-aǵartý mınıstrligi málim etti.
Eger ótken jyly kolledjder men bıznes arasyndaǵy kelisimder sany 498 bolsa, búginde ol 4,1 myńnan asty, ıaǵnı 8 esege ósti. Bul seriktestikke iri, shaǵyn bıznes ókilderi belsendi qatysyp otyr.
Sheftik qoldaýdyń kómegimen kolledjderdiń materıaldyq-tehnıkalyq bazasy men bilim berý baǵdarlamalary suranysqa saı jańartylyp, stýdentter men oqytýshylarǵa arnalǵan taǵylymdamalar uıymdastyryldy.
— Tehnıkalyq jáne kásiptik bilim berý júıesinde bıznespen áriptestik belsendi túrde nyǵaıyp keledi. Jumys berýshiler 8 myńnan astam bilim berý baǵdarlamasyn ázirleýge qatysty, sonymen qatar oqý kabınetteri men zerthanalar jańartylýda, — dep atap ótti departament dırektory Áset Muhanbetov.
Aıta ketý kerek, búginde 100 myńnan astam stýdent dýaldy júıemen oqıdy, 40 myńnan astamy kásiporyndardyń tapsyrysy boıynsha bilim alýda, onyń ishinde 15 myńy bıylǵy oqý jylynda qabyldanǵan.
Tıimdiliktiń negizgi kórsetkishteriniń biri — túlekterdiń jumysqa ornalasý deńgeıiniń artýy. 2024 jyly kolledj túlekteriniń jumyspen qamtylý kórsetkishi 81%-ǵa jetti.
Buǵan deıin habarlanǵandaı, Mańǵystaýda «Jumysshy mamandyqtar jyly» aıasynda 850 bos jumys oryndary usynyldy.