Bir jyl ishinde Germanııa avtopromy 50 myńnan astam jumys ornyn qysqartty

ASTANA. KAZINFORM – Germanııadaǵy avtokólik ónerkásibinde bir jyl ishinde qyzmetkerler sany 7 paıyzǵa azaıyp, shamamen 51 500 adam jumyssyz qaldy, dep habarlaıdy DW.

EY aýdıtorlyq kompanııasynyń jańa zertteýine sáıkes, nemis avtokontsernderi salanyń jaǵdaıyna baılanysty únemdeý sharalaryn qabyldaýǵa májbúr. Avtoındýstrııaǵa Qytaıdaǵy elektromobılder naryǵynyń kúrt ósýi – nemis óndirýshileri úshin basty eksporttyq naryqtaǵy ózgerister aıtarlyqtaı áser etti.

Sonymen qatar, Germanııadaǵy avtomobıl ónerkásibiniń ahýalyna energııa shyǵyndarynyń ósýi jáne AQSh prezıdenti Donald Tramp ákimshiliginiń Eýroodaqtan keletin ónimderge engizgen kedendik baj salyǵy yqpal etti.

Buǵan qosa, Eýropadaǵy suranys 2019 jylǵy deńgeıge áli jetken joq.

Ekonomıkalyq daǵdarys nemis avtopromynyń ózge segmentterine de áser etti. 2025 jylǵy maýsymdaǵy jaǵdaı boıynsha bul salada 5,42 mıllıon adam eńbek etýde, bul ótken jylmen salystyrǵanda 2,1 paıyzǵa az.

EY sarapshylary jas mamandar arasyndaǵy jumyssyzdyqtyń artýyna da alańdaýly.

DPA agenttiginiń habarlaýynsha, uzaq jyldar boıy tehnıkalyq mamandyqtar nemis ónerkásibinde túlekterge turaqty jumysqa ornalasý múmkindigin berip kelgen, biraq qazir kóptegen jas ınjenerlerge qaıta beıimdelý qajet bolady.

- Máseleler men qysqartýlarǵa tek avtoprom ǵana emes, mashına jasaý jáne metallýrgııa da tap boldy. 

Al elektronıka, hımııa jáne farmatsevtıka salalarynda jaǵdaı salystyrmaly túrde turaqty kúıinde qalyp otyr, - delingen EY baıandamasynda.