Bir jyl boıy zeınetaqy almadym: Shymkenttegi beıimdeý ortalyǵy tekserilip jatyr
ShYMKENT. KAZINFORM — Shymkenttegi naqty turǵylyqty jeri joq adamdarǵa arnalǵan áleýmettik beıimdeý ortalyǵyna ornalastyrylǵan azamattardyń mekemedegi jaǵdaıǵa shaǵymdanǵan vıdeosy áleýmettik jelide tarady.
Beınejazbada zeınetkerlerdiń biri bir jyl boıy zeınetaqy almaǵanyn, sondaı-aq óziniń bank kartasy men qarajatyn ortalyq qyzmetkeri alyp otyrǵanyn aıtqan.
Jaǵdaıǵa qatysty Shymkent qalalyq jumyspen qamtý jáne áleýmettik qorǵaý basqarmasy túsinik berdi.
Vedomstvonyń málimetinshe, jelide taraǵan jazbaǵa baılanysty Shymkent qalasy ákimdiginiń, jumyspen qamtý jáne áleýmettik qorǵaý basqarmasynyń jáne tıisti quzyrly organdardyń ókilderinen arnaıy komıssııa quryldy. Qazir komıssııa tekserý jumystaryn júrgizip jatyr.
— Áleýmettik jelilerde taraǵan aqparattardaǵy árbir derek jan-jaqty zerdelenedi. Atap aıtqanda, qyzmet alýshylardyń zeınetaqy tólemderi, zorlyq-zombylyq faktileri, densaýlyq jaǵdaıy, sondaı-aq adam ólimine qatysty málimetter tıisti quzyrly organdar tarapynan tekseriledi, — delingen basqarma habarlamasynda.
Tekserý qorytyndysy boıynsha anyqtalǵan derekterge quqyqtyq baǵa berilip, zańnama talaptaryna sáıkes qosymsha aqparat usynylady.
Sonymen qatar basqarma áleýmettik jelilerde taraǵan aqparattyń barlyǵy shyndyqqa sáıkes kele bermeıtinin atap ótti.
— Qala turǵyndarynan quzyrly organdar tarapynan quqyqtyq baǵa berilgenge deıin áleýmettik jelilerde taraǵan aqparatty shynaıy derek retinde qabyldap, jalǵan málimet taratpaýdy suraımyz. Ol úshin Qazaqstan Respýblıkasy Qylmystyq kodeksiniń 274-babynda jaýapkershilik kózdelgen, — dep málimdedi basqarma.
Buǵan deıin SQO-daǵy áleýmettik ortalyqtarda birqatar zańbuzý anyqtalǵanyn habarlaǵan edik.
