Bir jasqa deıingi balalarǵa qandaı ekpeler salyný kerek
ASTANA. KAZINFORM – №11 qalalyq emhananyń balalar bólimshesiniń meńgerýshisi Móldir Ibragımova vaktsınatsııalaýdyń balanyń ómiriniń alǵashqy jyldarynda asa mańyzdy ekenin jáne Qazaqstannyń profılaktıkalyq ekpeleriniń ulttyq kúntizbesinde qandaı ekpeler kózdelgenin aıtyp berdi.
Vaktsınatsııalaý ınfektsııaǵa tap bolǵanǵa deıin ımmýnıtet qalyptastyrýǵa kómektesip, aýrýlardyń aýyr ótýi men asqyný qaýpin tómendetedi.
Balanyń ómiriniń alǵashqy kúnderinde týberkýlezge (BTsJ) jáne V vırýstyq gepatıtine qarsy ekpeler jasalady.
Al 2, 3 jáne 4 aıynda kókjótelge, dıfterııaǵa, sirespege, polıomıelıtke, Hib-ınfektsııasyna jáne pnevmokokk ınfektsııasyna qarsy vaktsınatsııalaý júrgiziledi.
– Vaktsınatsııalaý merzimderin saqtaý jáne josparly ekpelerdi ótkizip almaý mańyzdy. Ata-analardyń suraqtary nemese kúmáni bolsa, olardy mindetti túrde dárigermen talqylaǵan jón. Vaktsınatsııalaý – balany búgin jáne bolashaqta qorǵaýdyń mańyzdy joly, – dedi Móldir Ibragımova.
Aıta keteıik, buǵan deıin Qazaqstanda profılaktıkalyq ekpelerdiń ulttyq kúntizbesine ózgerister engizilgeni habarlanǵan. Sonyń ishinde adam papılloma vırýsyna qarsy vaktsınatsııalaý ulttyq ekpe kúntizbesine engizildi.
