Bir jármeńke — myń tonna et: astanalyqtar bes óńirdiń soǵymynan dám tata alady
ASTANA. KAZINFORM — Erteń, 7 qarasha kúni saǵat 09:00–de Astanada Saýda jáne ıntegratsııa mınıstrliginiń qoldaýymen «Soǵym-FEST» aýqymdy et jármeńkesi bastalady. Shara aıasynda otandyq óndirýshilerdiń 1 000 tonnadan astam et ónimin satý josparlanyp otyr.
Aldaǵy ýaqytta mundaı jármeńkelerdi elimizdiń barlyq óńirinde ótkizý kózdelgen. Jármeńkege Aqmola, Abaı, Qaraǵandy, Pavlodar jáne elimizdiń basqa da oblystarynan kelgen sharýa qojalyqtary qatysady.
Іs-sharanyń negizgi maqsaty — halyqty sapaly et ónimderimen qoljetimdi baǵada qamtamasyz etý, otandyq aýyl sharýashylyǵy óndirýshilerine óz ónimderin tikeleı satýǵa jaǵdaı jasaý jáne fermerler men tutynýshylar arasyndaǵy deldaldar sanyn qysqartý.
Mundaı jármeńkelerdi ótkizý ishki saýdany damytýdyń, otandyq óndirýshilerdi qoldaýdyń jáne halyq úshin azyq-túlik taýarlarynyń qoljetimdiligin arttyrýdyń mańyzdy tetikteriniń biri bolyp sanalady.
Sonymen qatar, «Soǵym-FEST» ulttyq dástúrlerdi saqtaýǵa baǵyttalǵan. Soǵym- qazaq halqynyń qystyq et daıyndaýǵa baılanysty ejelden kele jatqan dástúri. Urpaqtan urpaqqa jalǵasqan bul dástúr otbasylardy bir dastarhan basyna jınap, aǵaıyn-týystyń arasyn jaqyndastyrady. Búginde «Soǵym-FEST» osy dástúrdi zamanaýı formatta jalǵastyryp, turǵyndarǵa et ónimderin tikeleı fermerlerden satyp alýǵa múmkindik beredi.
Jármeńkeler ár demalys saıyn saǵat 09:00–den 19:00–ge deıin elordanyń úsh saýda alańynda ótedi:
• «Keruen Joly» saýda ortalyǵy — Alash tasjoly, 35B;
• «Et Álemi» saýda ortalyǵy — Alash tasjoly, 31/1;
• «Jurt» saýda ortalyǵy — Beıbarys Sultan kóshesi, 3.
Budan buryn elimizde soǵym baǵasy qansha ekenin jazǵanbyz.
