Bir jankúıerdiń armany: Meksıkada Dımashtyń mýraly qalaı paıda boldy

ASTANA. KAZINFORM — Meksıkanyń Monterreı qalasyndaǵy Dımash Qudaıbergen beınelengen mýral qala aýmaǵynan tys jerlerge de keńinen tanylyp úlgerdi, dep habarlaıdy dimashnews.

Bir jankúıerdiń armany: Meksıkada Dımashtyń mýraly qalaı paıda boldy
Foto: dimashnews

14 qarashadaǵy kontsertten keıin qazaqstandyq ánshi osy orynǵa arnaıy kelip, dostarymen birge jankúıerlerine mýzykalyq tartý ázirledi. Alaıda Qazaqstan men Meksıkanyń sımvolyna aınalǵan bul jarqyn týyndynyń tarıhy atalǵan oqıǵadan áldeqaıda buryn bastalǵan edi.

Bir jankúıerdiń armany: Meksıkada Dımashtyń mýraly qalaı paıda boldy
Foto: dimashnews

Bir jankúıerdiń ıdeıasynan ortaq jobaǵa deıin

Barlyǵy 2025 jyly jergilikti Dears Regias MTY fan-klýbynyń múshesi Brenda Lorena Eskamılıa Martınestiń bastamasynan bastaldy. Ol Monterreı turǵyndaryn Dımashtyń ónerimen keńinen tanystyrýdy armandap, qalada ánshiniń beınesi salynǵan mýral jasaýdy usynady.

Bir jankúıerdiń armany: Meksıkada Dımashtyń mýraly qalaı paıda boldy
Foto: dimashnews

Bul oıdy júzege asyrý úshin qolaıly oryn tabý qajet bolady. Jankúıerler birneshe aı boıy qalanyń adam kóp júretin, qoljetimdi ári kózge birden túsetin bóliginen qabyrǵa izdeıdi.

Aqyrynda olar Monterreıdiń Callejón Cultural dep atalatyn Mádenıet tuıyq kóshesin tańdaıdy. Bul oryn kóne buıymdar, qolóner týyndylary men jergilikti sheberlerdiń ónimderi satylatyn dástúrli jeksenbilik bazarymen tanymal.

Bir jankúıerdiń armany: Meksıkada Dımashtyń mýraly qalaı paıda boldy
Foto: dimashnews

Ǵımarat ıesiniń ruqsatyn alǵannan keıin fan-klýb músheleri bolashaq kompozıtsııany ázirleýge kiristi. Bastamany júzege asyrýǵa Brendanyń jubaıy, kásibı mýral sýretshisi Antonıo Reına Trýhılo kómektesedi.

Dears Regias músheleri mýraldy qalaı jasady?

Jumys sýret salýdan emes, qabyrǵany daıyndaýdan bastaldy. Eski boıaýdy ketirip, qabyrǵa betin tazartý jáne aq tústi astar jaǵý qajet boldy.

Dımashtyń jankúıerleri bos ýaqyttaryn osy jobaǵa arnap, keshki ýaqytta jáne demalys kúnderi bas qosyp júrdi. Daıyndyq kezeńi aıaqtalǵannan keıin Antonıo kompozıtsııanyń nobaıyn túsiredi, al fan-klýb músheleri onyń iri bólikterin boıaýǵa kómektesedi.

Bir jankúıerdiń armany: Meksıkada Dımashtyń mýraly qalaı paıda boldy
Foto: dimashnews

Solardyń biri — Monterreıdiń basty nyshandarynyń biri sanalatyn áıgili Serro-de-la-Sılıa, ıaǵnı Ertoqym pishindi taý beınesi edi.

Jumystyń qorytyndy kezeńin sýretshi ózi atqardy: ol Dımash portretiniń keskin syzyqtary men usaq bólshekterin muqııat óńdep, ortaq ıdeıany birtindep aıaqtalǵan kórkem týyndyǵa aınaldyrdy.

Alǵashqy mýral 2025 jyly ónerpazdyń 31 jasqa tolýyna oraı jasaldy.

a
Foto: dimashnews

Kompozıtsııaǵa Dımashtyń jankúıerlerine degen kózqarasyn bildiretin myna sózderi de engizildi.

— Qurmetti Dears — adamdardyń bir-birimen shekaraǵa bólinbeı, qalaı dos bolýy kerektiginiń úlgisi. Biz bárimiz bir aspan astynda ómir súremiz, — delingen jazbada.

a
Foto: dimashnews

Mýral avtorlary úshin bul sózder jobanyń negizgi ıdeıalarynyń birine aınalyp, mýzyka biriktirgen túrli ult ókilderiniń dostyǵyn aıshyqtady.

Jańa kezeń: Qazaqstan men Meksıka nyshandarynyń bir kompozıtsııada toǵysýy

2026 jyly Dımashtyń DIMENSIONS álemdik týry aıasyndaǵy Meksıka kontsertteri qarsańynda jankúıerler qoldanystaǵy mýraldy keńeıtýdi uıǵardy.

Jobaǵa Antonıo Reına Trýhılo qaıta qosyldy. Bul joly ózgerister sýrettiń kólemimen ǵana shektelmedi. Jankúıerler kórkemdik detaldar arqyly eki el arasyndaǵy baılanysty aıqyndaýdy kózdedi.

a
Foto: dimashnews

Jańartylǵan kompozıtsııada Dımashtyń Meksıka týymen beınelengen portreti oryn aldy. Bul — ónerpazben Meksıka jerinde qaýyshýdyń qýanyshyn bildiretin nyshan.

Aınalasyndaǵy peızaj da ózgerdi. Sýretshi Serro-de-la-Sılıa taýynyń beınesin úlkeıtip, aspannyń tústik reńkterin jańartyp, oǵan Qazaqstannyń Memlekettik týyndaǵy altyn kúndi qosty.

a
Foto: dimashnews

Osylaısha bir kórkemdik keńistikte kópshilikke tanys eki nyshan — Monterreıdi beıneleıtin taý men Dımashtyń týǵan elin eske salatyn kún toǵysty.

Fan-klýb músheleriniń aıtýynsha, olar osy detaldar arqyly Qazaqstanǵa degen qurmetin bildirip, mýzykanyń aralaryn myńdaǵan shaqyrym bólip jatqan mádenıetterdi jaqyndastyra alatynyn kórsetkisi kelgen.

Jankúıerlerdiń basyn qosqan mýral

Ýaqyt óte kele mýral aınalasy Dımashtyń álemniń túrli elderindegi jankúıerleri bas qosatyn orynǵa aınaldy.

a
Foto: dimashnews

Olar munda sýretke túsý úshin ǵana kelmeıdi. Dears bul jerde kezdesýge ýaǵdalasyp, bir-birimen tanysyp, ónerpazdyń ánderin birge shyrqap, kontsertterden alǵan áserlerimen bólisedi.

Dımashtyń arnaıy kelýi joba avtorlary úshin erekshe tartý boldy.

a
Foto: dimashnews

Monterreıdegi kontsertinen keıin ónerpaz dostarymen birge mýralǵa arnaıy kelip, Temirlan & Yernat dýetiniń repertýaryndaǵy «Sheksizdik» kompozıtsııasyna mýzykalyq beınejazba túsirdi.

Beınejazbaǵa Dımash Qudaıbergen, Ernat Naýryz, Temirlan Oljabaı, Sanjaı Álmishev, Oljas Qurmanbek jáne Rasýl Ýsmanov qatysty. Meksıka kóshesinde qazaqtyń ulttyq aspaptary — dombyra, sybyzǵy men qobyzdyń úni áýeledi.

a
Foto: dimashnews

— Osynaý ásem qalanyń bir kóshesinen óz beınem beınelengen mýraldy kórý — meniń jadymda máńgi saqtalatyn syı, — dep Dımash áleýmettik jelilerde jankúıerlerine olardyń yqylasy men ystyq sezimderi úshin alǵysyn bildirdi.

Buǵan deıin Dımashtyń Monterreıdegi kontserti qalaı ótkenin jazǵan edik.