Bir vıdeo – myńdaǵan klıent: shaǵyn bıznes TikTok-ty qalaı paıdalanady
ASTANA. KAZINFORM – Áleýmettik jelide mıllıondap qaralǵan beınejazba kásipkerge qansha tabys ákelýi múmkin? Kazinform tilshisi gúl saýdasymen jáne bylǵary buıymdar tigýmen aınalysatyn kásipkerlermen sóılesip, qysqa vıdeolardyń jańa klıentter tartýǵa, ónimdi tanytýǵa jáne tapsyrys sanyn arttyrýǵa qalaı yqpal etetinin surap kórdi.
Jarnama ornyna shynaıy emotsııa
Gúl saýdasy naryǵynda kásibin júrgizip júrgen Ádil Tasbolatovtyń aıtýynsha, qazir aqyly jarnamaǵa qarjy jumsamaı-aq keń aýdıtorııaǵa shyǵýǵa múmkindik bar.
– Biz árdaıym jańa platformalardy zertteımiz. TikTok-ty alǵash paıdalana bastaǵanda onyń basqa platformalarmen salystyrǵanda aqyly jarnamasyz-aq qanshalyqty keń aýdıtorııaǵa shyǵýǵa múmkindik beretinin baıqadym. Alǵashynda jeke paraqshamda kontent jarııaladym. Eshqandaı qarjy jumsamadyq, biraq vıdeolarymyz jaqsy tarala bastady. Munda eń mańyzdysy – kórermenniń nazaryn birden aýdarý, - deıdi ol.
Kásipkerdiń sózinshe, qysqa beınejazbanyń tabysty bolýy kóbine alǵashqy sekýndtarǵa, ıaǵnı hook tásiline baılanysty. Eger kórermendi birden qyzyqtyra almasa, ol kelesi vıdeoǵa ótip ketýi múmkin. Sondyqtan komanda beınejazbanyń basynda nazar aýdaratyn sátterdi kórsetip, oqıǵanyń qalaı aıaqtalatynyn sońyna deıin kórýge yntalandyrady. Máselen, komanda keıbir vıdeolardyń sońynda qatysýshylarǵa kútpegen syılyq usynyp, oqıǵanyń nemen aıaqtalatynyn bilýge degen qyzyǵýshylyqty arttyrady.
Kásipkerdiń pikirinshe, qaralymnyń kóp bolýy beınejazbanyń uzaqtyǵynda nemese túsirilimge jumsalǵan qarajatta ǵana emes, kórermenniń qyzyǵýshylyǵyn qanshalyqty ustap tura alatynynda.
Al kompanııanyń kontent-meıkeri Dana Nursha áleýmettik jelidegi jumystyń taǵy bir mańyzdy qyryna toqtaldy. Onyń aıtýynsha, basty maqsattardyń biri – brendti kópshilikke jaqyndatý.
– Biz ónimderimizdiń kópshilikke qoljetimdi ekenin kórsetkimiz keldi. Óıtkeni adamdar bizdi kóbine qymbat gúl satatyn dúken retinde qabyldaıtyn. Sondyqtan gúldi jarnamalaýdan góri, adamdardyń shynaıy qýanyshy men áserin kórsetýge basymdyq berdik. Sonyń nátıjesinde vıdeolarymyzdyń qaralymy artyp, kópshiliktiń qyzyǵýshylyǵyn oıata aldyq. Keıin bul satylymǵa da oń áser etti, - deıdi.
Osy maqsatta komanda kóshede beıtanys adamdarǵa tegin gúl syılap, olardyń qýanyshyn beınejazbaǵa túsirgen. Keıde turǵyndarǵa suraq qoıyp, kútpegen jerden gúl shoǵyn tabystaǵan. Mundaı vıdeolarda basty nazar gúldiń baǵasyna nemese ony satyp alýǵa shaqyrýǵa emes, adamdardyń emotsııasyna aýdarylady.
Onyń sózinshe, mundaı beınejazbalar arqyly kompanııa óz ónimderin tanystyryp qana qoımaı, kórermendermen jaqynyraq baılanys ornata alǵan. Adamdar vıdeolarǵa pikir jazyp, olardy ózgelermen bólise bastaǵan. Bul brendtiń tanymaldyǵyna da áser etken.
Qazir kompanııa Qazaqstannyń birneshe qalasynda jumys isteıdi, franshızalyq jelisi de bar. Dana Nurshanyń aıtýynsha, tipti Chıkagoda da dúkeni ashylǵan.
Qolónerdi kontentke aınaldyrǵan sheber
Al bylǵarydan buıymdar jasaıtyn Oleg Tıan áleýmettik jelini múlde basqa baǵytta paıdalanady. Ol úshin bastysy – daıyn taýardy kórsetý emes, onyń qalaı jasalatynyn kórsetý.
Oleg Tıan aǵasymen birge 2017 jyldyń sońynda bylǵarydan buıym jasaýdy qolǵa alǵan. Alǵashynda ekeýi bul kásipti úı jaǵdaıynda úırenip, túrli tásildi zerttegen. Keıin ózderi jasaǵan ónimderge suranys bar-joǵyn anyqtaý úshin shaǵyn tseh ashýǵa bel býady.
Aǵaıyndylar jertóleden oryn jaldap, jumysty bastaıdy. Alǵashqy kezde áleýmettik jeliler arqyly ónimderin tanystyryp, tutynýshylar izdeıdi. Sheberhana ashylǵannan keıin shamamen bir jarym aı ótkende alǵashqy korporatıvtik tapsyrys túsedi. Osy tapsyrys kásiptiń odan ári damýyna jol ashady.
– Sol kezde mundaı ónimderge shynymen suranys bar ekenin túsindik. Tapsyrysty oryndaǵannan keıin túsken qarajatqa qosymsha jabdyq satyp alyp, óndiristi birtindep keńeıte bastadyq, - deıdi kásipker.
Qazir sheberhanada ámııan, portmone, kartholder jáne basqa da bylǵary buıymdar jasalady. Kásipkerler ónim túrlerin birtindep kóbeıtip keledi. Sonymen qatar tapsyrys berýshilerge buıymdy óz qalaýyna qaraı bezendirýge múmkindik beredi. Máselen, satyp alýshy ámııanǵa adamnyń aty-jónin, sýretin nemese úı janýarynyń beınesin túsirte alady. Ol úshin lazerlik gravırovka sııaqty tásilder qoldanylady. Mundaı buıymdar, ásirese jaqyn adamdarǵa syılyq retinde usynylatyn kórinedi.
– Biz TikTok-ta da ónimderimizdi tanystyramyz. Bul platformanyń biz úshin ereksheligi – ony jaı ǵana onlaın dúken retinde paıdalanbaımyz. Eń aldymen, buıymnyń jasalý protsesin kórsetemiz. Bylǵaryny qalaı pishetinimizdi, óńdeıtinimizdi, qalaı tigetinimizdi túsiremiz. Adamdar ónimniń daıyn kúıinde qaıdan kelgenin ǵana emes, onyń basynan aıaǵyna deıin qalaı jasalǵanyn kórgisi keledi, - deıdi Oleg Tıan.
Kásipkerdiń sózinshe, mundaı beınejazbalar adamdardyń qol eńbegine degen qyzyǵýshylyǵyn arttyrady. Kórermen buıymnyń jasalý kezeńderin baqylap, pikir qaldyrady, suraq qoıady. Keıbiri ónimdi satyp alýǵa qyzyǵýshylyq tanytady.
Oleg Tıan muny áleýmettik jelidegi adamdardyń ádetimen baılanystyrady. Onyń aıtýynsha, jumystan keıin áleýmettik jelini qarap otyrǵan adam bir buıymnyń qalaı jasalatynyn kórse, protsesti sońyna deıin baqylaýǵa qyzyǵýy múmkin.
– Bizdiń kontent te osyǵan negizdelgen. Pikirlerden, jazylýshylardyń belsendiliginen adamdarǵa mundaı protsess qyzyq ekenin baıqaımyz. Sheberhana úshin áleýmettik jeli jańa tutynýshylar tabýdyń bir joly bolǵanymen, klıentterdiń taýardy bir-birine usynýynyń da mańyzy zor. Keıbir satyp alýshylar buıymdy ózine alyp, keıin jaqyndaryna syılyq retinde qaıta tapsyrys beredi, - deıdi kásipker.
Sheberhanada bylǵarydan buıym jasaýdy úıretetin sheberlik sabaqtary da ótedi.
– Bizge sheberlik sabaqtaryna keletin adamdardyń arasynda óte belsendi, qyzyǵýshylyǵy joǵary jandar bar. Olarmen tanysyp, sóılesemiz, tájirıbemizben bólisemiz. Keıbiri keıin úıinde bylǵarydan buıym jasaı bastaıdy, endi biri muny kásipke aınaldyrady. Biz olardy básekeles retinde emes, bir kásipti meńgergen áriptes retinde baǵalaımyz. Bireýdiń qolynan is kelip jatsa, biz de qýanamyz, - deıdi Oleg Tıan.
Qazir Almatydaǵy sheberhananyń ónimderi Qazaqstannyń basqa óńirlerine jáne shetelge de jetkiziledi.
Bir vıdeo birneshe jyldyq jarnamadan tıimdi bolýy múmkin
Áleýmettik jeliniń bızneske yqpaly tek jekelegen kásipkerlerdiń tájirıbesinen ǵana baıqalmaıdy. TikTok pen «Atameken» ulttyq kásipkerler palatasynyń birlesken zertteýinde platformany paıdalaný jıiligi, marketıngtik shyǵyndar jáne kásipkerlerdiń tabysqa qatysty baǵalaýy da qarastyrylǵan.
Saýalnama nátıjesinde kásiporyndardyń 14,6%-y TikTok-taǵy belsendilikpen baılanystyratyn tabys úlesin keminde 25% dep baǵalaǵan. Al platformany apta saıyn nemese odan jıi paıdalanatyn kásiporyndardyń shamamen 11%-y jalpy tabysynyń jartysynan astamyn baılanystyratynyn málimdegen.
Marketıngtik shyǵyndarǵa qatysty kórsetkishter de nazar aýdartady. Arnaıy bıýdjet bólmeıtin kásiporyndar jalpy tabysynyń orta eseppen 3,9%-yn osy platformamen baılanystyrǵan. Al marketıngtik bıýdjetiniń 70%-dan astamyn TikTok-qa baǵyttaıtyn kompanııalarda bul kórsetkish 42%-ǵa jetken.
«Atameken» ulttyq kásipkerler palatasy basqarma tóraǵasynyń orynbasary Aslan Qalıǵazın áleýmettik jelilerdiń shaǵyn jáne orta bıznes úshin mańyzy artyp kele jatqanyn atap ótti.
– Qazir áleýmettik jelilerdiń, ásirese TikTok platformasynyń shaǵyn jáne orta bıznes ónimderin tanytýdaǵy yqpaly zor. TikTok-ta jarııalanǵan bir beınejazba shaǵyn kásiporynnyń óz ónimin birneshe jyl boıy jarnamalaý arqyly qol jetkizgisi kelgen nátıjesinen de asyp túsýi múmkin, - dedi ol.
Budan bólek, saýalnamaǵa qatysqan kásipkerlerdiń 43,7%-y bul platformany bıznes maqsatynda aı saıyn paıdalanatynyn habarlaǵan. Bul - ótken jylǵy uqsas zertteýdegi kórsetkishten 29,5%-ǵa kóp. Al 27,2%-y apta saıyn nemese odan da jıi paıdalanady. Osylaısha, zertteý saýalnamaǵa qatysýshylardyń 70%-dan astamy platformany aıyna keminde bir ret paıdalanatynyn kórsetip otyr.
