Bir týrıstik nysandy birneshe mekeme qarjy jumsap jarnamalaıdy — depýtat

ASTANA. KAZINFORM — Májilis depýtaty Ekaterına Smolıakova «Jibek loly» arnasynyń mobıldi stýdııasynda týrızmdi damytý boıynsha usynystaryn ortaǵa saldy.

Depýtattyń aıtýynsha, sońǵy 4 jylda Qazaqstan týrızmnan 1,2 trln teńge tabys tapqan. Týrıster sany ósip, damý tendentsııasy baıqalsa da sala zańnamalyq jáne ınfraqurylymdyq tolyqtyrýlardy qajet etedi. 

— Osyǵan baılanysty Májiliste zań jobasyna túzetýler engizý usynyldy. Maqsat — ishki týrızmdi damytý. Biz 3 mańyzdy usynys berdik, — deıdi Ekaterına Smolıakova.

Depýtat aldymen kásipkerlerdi qoldaý qajettigin aıtty.

— Eldegi birqatar týrıstik nysandy aralap shyqtym. Máselen ShQO-daǵy tabıǵaty kórkem Qatonqaraǵaıǵa bardym. Munda kásipkerler sý týrızmin damytqysy keledi. Aldaǵy ýaqytta olarǵa sýbsıdııa berý tetikterin júıelep, mólsherin belgileý mindeti tur, — deıdi depýtat.

Smolıakova mınıstrlik vızıt ortalyqtardyń úlgilik erejesin bekitý kerek dep sanaıdy. 

— Ár óńirde basym týrıstik aımaqtar bar. Sony anyqtaý jáne belgileý jergilikti ýákiletti organ — máslıhat pen qoǵamdyq keńesterdiń mindeti bolý kerek. Olar usynystaryn berse, Týrızm jáne sport mınıstrligi olardy resmı saıttaryna júktep otyrady, — deıdi spıker.

Al úshinshi usynys — «Kazakh Tourism» ulttyq kompanııasynyń jumysyna qatysty.

— Kompanııanyń negizgi maqsaty — marketıng jáne eldiń ımıdjin halyqaralyq arenada ilgeriletý. Qazir bir týrıstik nysandy birneshe mekeme qarjy jumsap, jarnamalaıdy. Onyń ishinde «Kazakh Tourism», jergilikti ákimdikter, Almatydaǵy týrızm bıýrosy bar. Bul qosymsha shyǵynǵa ákeledi. Osyǵan baılanysty biz ókilettilikti tek «Kazakh Tourism»-de qaldyrýdy usynamyz, — deıdi depýtat.

Aıta keteıik, keshe Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine týrıstik salany qoldaý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.