Bir túnde jol apatynan 15 adam qaza tapty
ASTANA. KAZINFORM — 13-nen 14 qyrkúıekke qaraǵan túni respýblıka aýmaǵynda eki iri jol-kólik oqıǵasy oryn alyp, 15 adam qaza tapty. Bul týraly QazAvtoJol-dyń baspasóz qyzmeti málim etti.
13 qyrkúıek kúni saǵat 23:30 shamasynda Qaraǵandy oblysynda, «Qaraǵandy — Aıagóz — Boǵas» avtojolynyń Sheshenqara aýyly mańynda Ford Mondeo avtokóliginiń júrgizýshisi Qarqaraly qalasynan Qaraǵandy baǵytyna qozǵalys barysynda belgilenbegen jerde qarsy jolaqqa shyǵyp ketip, Changan avtokóligimen soqtyǵysqan. Apat saldarynan bes adam oqıǵa ornynda kóz jumdy.
2025 jylǵy 14 qyrkúıek kúni saǵat 01:39 shamasynda Jetisý oblysynda, «Almaty — Óskemen» avtojolynyń 479-shaqyrymynda Nissan Cefiro avtokóliginiń júrgizýshisi ońtústik baǵytta qozǵalyp kele jatyp, qarsy jolaqqa shyǵyp, aldymen Lada VAZ avtokóligimen, keıinnen Chevrolet Cobalt avtokóligimen soqtyǵysqan.
Apat saldarynan Nissan Cefiro júrgizýshisi oqıǵa ornynda qaza tapty. Lada VAZ avtokóliginde bolǵan tórt adamnyń bireýi kóz jumdy, taǵy bireýi jaraqat alyp, aýrýhanaǵa jetkizildi. Chevrolet Cobalt avtokóliginde segiz adam, sonyń ishinde bir bala bolǵan. Aldyn ala málimetter boıynsha olardyń barlyǵy oqıǵa ornynda qaza tapqan.
Júrgizilgen tekserý nátıjesinde eki jol ýchaskesinde de jol jamylǵysynyń tegis ekendigi jáne kólik qozǵalysyna kedergi keltiretin aqaýlardyń anyqtalmaǵany belgili boldy. «Almaty — Óskemen» avtojoly 2024 jyldyń jeltoqsan aıynda qaıta jańǵyrtýdan keıin paıdalanýǵa berilgen. Jol jabyndysy normatıvtik talaptarǵa tolyq sáıkes keledi. Al «Qaraǵandy — Aıagóz — Boǵas» avtojolynda buǵan deıin ortasha jóndeý jumystary júrgizilgen, jabynnyń jaǵdaıy da belgilengen standarttarǵa saı.
— Sońǵy jyldary qaıta jóndeý jáne jańartý jumystary aıaqtalǵannan keıin jol-kólik oqıǵalarynyń jıilep otyrǵany baıqalady. Tegis jol men ashyq kóriný múmkindigin paıdalanyp, kóptegen júrgizýshiler jyldamdyqty shamadan tys asyryp, jol qozǵalysy erejelerin buzýda. Mundaı jaýapsyzdyq orny tolmas qaıǵyly jaǵdaılarǵa ákelip otyr. Jol-kólik oqıǵalarynyń aldyn alý úshin jyldamdyq rejımin, qarsy betke shyǵý qaǵıdalaryn jáne jol qozǵalysynyń barlyq erejelerin qatań saqtaýǵa shaqyramyz, — dep jazdy kompanııadan.
Eske sala keteıik, 11 qyrkúıek kúni Mańǵystaý oblysy Qaraqııa aýdany Senek eldi mekeninen 90 shaqyrym qashyqtyqta jantúrshigerlik jol apaty bolyp, 10 adam qaza tapqan bolatyn.
Al 19 tamyz kúni Abaı oblysynyń Úrjar aýdanynda 55 jastaǵy Toyota kóliginiń júrgizýshisi rólge ıe bola almaı, úı qaqpasynyń janynda, joldan 10 metr qashyqtyqta turǵan kámeletke tolmaǵan balalardy qaǵyp ketken edi.
Qazaqstanda jol apaty nelikten kóbeıip ketti jáne ony qalaı toqtatýǵa bolady degen saýalǵa Kazinform tilshisi jaýap izdep kórdi.