Bir túnde Qostanaı oblysynda 140-qa jýyq adam evakýatsııalandy

ASTANA. KAZINFORM — Bir túnde Qorǵanys mınıstrliginiń áskerı ushqyshtary Qostanaı oblysyndaǵy 140-qa jýyq adamdy evakýatsııalady. 

Qutqarý jumystaryna Mı-171Sh, Mı-17 jáne Mı-8 kóliktik-jaýyngerlik tikushaqtarynyń ekıpajdary kiristi.

Eki táýlik ishinde apatty aımaqtan kóliktik-jaýyngerlik tikushaqtardyń ekıpajdary Arqalyq qalasynyń evakýatsııalyq pýnktterine 240 adamdy, onyń ishinde 60-tan astam balany jetkizdi. 

Túnde qutqarý jumystaryn júrgizýge tek Áskerı-áýe kúshteriniń ushqyshtaryna ǵana ruqsat etilgenin atap ótken jón.  Sonymen qatar Qorǵanys mınıstrliginiń áskerı-kóliktik avıatsııasy Almatydan Oralǵa Tótenshe jaǵdaılar mınıstrligi 28237 áskerı bóliminiń áskerı qyzmetshilerin jetkizdi. 

Aıta keteıik, Qorǵanys mınıstriniń nusqaýy boıynsha Qostanaı, Abaı, Aqtóbe jáne Batys Qazaqstan oblystarynyń jergilikti turǵyndaryna Áýe qorǵanysy kúshteri áskerı bólimderiniń áskerı qyzmetshileri kómek kórsetip jatyr. 

Buǵan deıin Kókshetaýda Qylshaqty ózeni arnasynan asyp, temirjol vokzaly mańyn sý basqanyn habarlaǵan bolatynbyz.