Bir top ýkraınalyq bala jazǵy demalysyn Qazaqstanda ótkizedi

ASTANA. KAZINFORM – «Baldáýren» respýblıkalyq oqý-saýyqtyrý ortalyǵyna Ýkraınadan bir top bala demalyp, ońaltýdan ótýge keldi. Bul týraly atalǵan ortalyq habarlaıdy.

«Baldáýren» halyqaralyq yntymaqtastyqty keńeıtip jatyr, balalardyń demalysyn uıymdastyrýda mol tájirıbesi bar ortalyq sheteldik balalardy da qabyldaı otyryp, mádenı baılanysty damytýǵa erekshe kóńil bóledi.

- Ortalyq jumys istegen jyldar ishinde munda álemniń 15 elinen kelgen balalar demaldy. Sońǵy úsh jyldyń ishinde «Baldáýren» ortalyǵy TMD elderinen, Qytaı, Túrkııa, Mońǵolııa jáne basqa da memleketterden kelgen 700-den astam sheteldik balany qabyldady. 3 maýsymda Qazaqstanǵa demalys pen ońaltýdan ótý úshin Ýkraınadan balalar toby keldi. Olar úshin bizdiń elimiz týraly tanymyn keńeıtýge baǵyttalǵan birqatar is-shara josparlanǵan. Atap aıtqanda, balalar «Býrabaı» memlekettik ulttyq tabıǵı parkine ekskýrsııa jasap, Astana qalasyndaǵy kórnekti oryndarǵa saıahattaıdy, - delingen habarlamada.

Aqparatta aıtylǵandaı, mundaı saparlar balalardyń oı-órisin keńeıtip qana qoımaı, mádenıetaralyq túsinistik pen ózara qurmetti qalyptastyrýǵa, halyqtar arasyndaǵy dostyqty nyǵaıtýǵa yqpal etedi.

- Balalyq shaq — baqyt mekeni. Ony birlese qorǵaý jáne damytý — barshaǵa ortaq mindet. Qazaqstan ár elden kelgen jas qonaqtarǵa esigin aıqara asha otyryp, halyqtar arasyndaǵy dostyqty qalyptastyrýǵa jáne senimge, qurmetke, jalpy adamzattyq qundylyqtarǵa negizdelgen álemniń negizin qalaıtyn jas urpaqty tárbıeleýge óz úlesin qosyp keledi, - dep habarlaıdy ortalyq.

Aıta keteıik, elimizde balalardyń jazǵy demalysyn uıymdastyrý úshin respýblıkalyq shtab quryldy. 

Sondaı-aq balalardyń jazǵy demalysy úshin lagerlerge arnalǵan jol kartasy bekitildi.