Bir top qurylysshy memlekettik nagradalarmen marapattaldy
ASTANA. KAZINFORM - Qazaqstan Respýblıkasynyń Prezıdenti Qasym-Jomart Toqaevtyń Jarlyǵymen Qurylysshy kúni qarsańynda otandyq qurylys salasyndaǵy jemisti eńbegi, elimizdiń ınfraqurylymdyq damýyna qosqan úlesi úshin salanyń bir top jumysshysy memlekettik nagradalarmen marapattaldy, dep habarlaıdy Aqordanyń baspasóz qyzmeti.
Atap aıtqanda, 4 azamat «Parasat» ordeniniń jáne 36 adam «Qurmet» ordeniniń kavaleri atandy. 40 jumysshy ІІІ dárejeli «Eńbek dańqy» ordenimen marapattalyp, 72 qurylysshy «Eren eńbegi úshin» medaliniń ıegeri boldy.
Aıta keteıik, elimizde Qurylysshy kúni tamyzdyń ekinshi jeksenbisinde atalyp ótedi.
Qurylys ındýstrııasy — ekonomıkanyń negizgi irgetasy. Kez kelgen eldiń ekonomıkalyq kúsh-qýaty men áleýmettik turaqtylyǵy qurylys salasynyń damýyna tikeleı baılanysty. Táýelsizdik jyldary elimizde qurylys salasyn damytýǵa barynsha jaǵdaı jasaldy. Otandyq qurylys ındýstrııasy qanat jaıyp, qurylys materıaldaryn shyǵaratyn óndiris oryndary kóbeıdi.
Elimizdegi qurylys salasynyń qarqyndy damýy - elordany Almatydan Aqmolaǵa kóshirý tarıhı sheshimimen tikeleı baılanysty. Sonyń arqasynda búginde Astanada ozyq tehnologııalarmen salynǵan sáýlet óneriniń zamanaýı úlgileri - erekshe ǵımarattar boı kótergen.
