Bir top balany urǵan jasóspirimniń isin mınıstr jeke baqylaýyna aldy
ASTANA. KAZINFORM – Oqý-aǵartý mınıstri Ǵanı Beısembaev áleýmettik jelide jasóspirim bir top balany turǵyzyp qoıyp, uryp jatqan beınejazbaǵa qatysty túsinik berdi.
- Ádette jumys kestesiniń tyǵyzdyǵyna baılanysty áleýmettik jelilerdegi jazbalardy turaqty baqylaýǵa múmkindik bola bermeıdi. Sondyqtan jarııalanǵan aryz-shaǵymdardy demalys kúnderi arnaıy qarap shyǵýǵa tyrysamyn. Keıde áleýmettik jeliler arqyly rasymen de alańdaýshylyq týdyratyn máselelerden habardar bolyp jatamyz. Mysaly, Almaty oblysy oqýshylarynyń shaǵymy meni beıjaı qaldyrmady. Másele bilim alýshylardyń quqyǵy buzylýy, mekteptegi tamaqtaný jaǵdaıynyń sanıtarııalyq talaptarǵa saı uıymdastyrylmaýy sııaqty faktilerdiń bolý yqtımaldyǵyna baılanysty, - dep jazdy jelidegi paraqshasynda Ǵanı Beısembaev.
Osy oraıda mınıstr jergilikti atqarýshy organdardyń óz mindetterin tolyqtaı oryndamaı otyrǵanyn aıtty.
- Bala quqyǵyn qorǵaý sharalaryn zańnamalyq turǵyda kúsheıtý maqsatynda mınıstrlik tarapynan úsh negizgi zańnamaǵa 94 túzetý engizilip, 2024 jyly tekserýden ótken 342 bilim berý uıymynyń 24-inde basshylar ákimshilik, 78-i tártiptik jaýapkershilikke tartylǵanyna qaramastan, mundaı jaǵdaılar áli de kezdesip otyr. Atalǵan jaǵdaı jeke baqylaýymda. Balalardyń quqyǵyn qorǵaý komıteti men aýmaqtyq bilim sapasyn qamtamasyz etý departamentiniń qatysýymen arnaıy jumys komıssııasyn qurýdy tapsyrdym. Komıssııa qoldanystaǵy zańnama aıasynda barlyq qajetti sharany qabyldaıdy. Almaty oblysynyń basshylyǵy bul máseleni shuǵyl túrde qolǵa alyp, aldaǵy ýaqytta mundaı keleńsizdikterge jol bermeý úshin naqty ári júıeli is-sharalar qabyldaıdy dep senemin, - deıdi vedomstvo basshysy.
Ǵ.Beısembaevtyń aıtýynsha, ár balanyń qaýipsizdigi – bilim berý júıesiniń barlyq deńgeıinde oryndalýy tıis strategııalyq mindet.
- Balalardyń quqyǵy men qaýipsizdigin qamtamasyz etý mınıstrliktiń turaqty baqylaýyndaǵy másele ekenin jergilikti ákimdikter de jaqsy biledi. Taǵy da óńirlerdegi bilim salasynyń basshylaryn osyndaı mańyzdy máselelerge joǵary jaýapkershilikpen qaraýǵa shaqyramyn, - deıdi mınıstr.
Eske sala keteıik, Almaty oblysynda jasóspirim álimjettik jasaǵan jaıtty polıtsııa tekserip jatqanyn habarlaǵan edik. Oqıǵa Almaty oblysy Іle aýdanynda bolǵan.
Byltyr Oqý-aǵartý mınıstri Ǵanı Beısembaev Jambyl oblysyndaǵy mektepke bógde adamdardyń kelýi jáne muǵalimderden aqsha jınaý oqıǵasyna qatysty pikir bildirip, alańdaýshylyq tanytqan edi.