Bir tabletka jetkilikti: gonoreıaǵa qarsy jańa dári jasaldy
ASTANA. KAZINFORM — Bir rettik qoldanýǵa arnalǵan jańa dári — zolıflodatsın — gonoreıany emdeýge arnalǵan. Ol jaqyn kúnderi maquldanýy tıis. Bul dári antıbıotıkterge tózimdiliktiń artyp kele jatqan jaǵdaıynda ınfektsııamen kúreste mańyzdy ról atqarýy múmkin, dep habarlaıdy Euronews.
Gonoreıa — jynystyq jolmen juǵatyn ınfektsııa, kóbine sımptomsyz ótedi. Ony emdemese, jatyr men jynys músheleriniń qabynýyna nemese bedeýlik sııaqty aýyr saldarǵa ákelýi múmkin.
Zolıflodatsın — sońǵy onjyldyqtardaǵy tek osy ınfektsııany emdeýge arnalǵan alǵashqy jańa antıbıotık. Ol dárige tózimdi sýperbakterııalarǵa qarsy baǵyttalǵan jáne jaqyn arada AQSh-ta satyla bastaıdy dep kútiledi.
Jaqynda zertteýshiler AQSh, Ońtústik Afrıka, Taıland, Belgııa jáne Nıderlandydan kelgen 900-den astam qatysýshymen klınıkalyq synaq júrgizdi. Bul Neisseria gonorrhoeae ınfektsııasyna qatysty aýqymdy zertteý boldy.
The Lancet jýrnalynda jarııalanǵan nátıjelerge sáıkes, jańa dári, ıaǵnı onyń bir tabletkasy 90%-dan astam jynystyq aǵzalar ınfektsııasyn emdeıdi.
— Gonoreıa álemdegi qoǵamdyq densaýlyq úshin áli de úlken problema bolyp otyr. Antıbıotıkterge tózimdiliktiń artýy jańa emdeý ádisterin qajet etedi, — dep atap ótti Alabama ýnıversıtetiniń medıtsına professory, zertteýdiń jetekshisi Edvard Hýk.
Ol sonymen qatar, sońǵy onjyldyqtarda jańa emdeý tásilderiniń bolmaýy jáne antıbıotıkterge tózimdiliktiń artýy ınfektsııany emdeýdi qıyndatqanyn aıtty.
2023 jyly Eýropalyq Odaqta gonoreıanyń rastalǵan jaǵdaılary shamamen 100 000-ǵa jetip, ár 100 000 adamǵa shaqqanda 25 jaǵdaı tirkeldi. Bul aldyńǵy jylmen salystyrǵanda 31% kóp.
Antıbıotıkterge tózimdiliktiń ósýi
Qazirgi tańda negizgi emdeý ádisi — tseftrıakson, sebebi ınfektsııa basqa tanymal antıbıotıkterge tózimdi bolyp ketken.
Eýropalyq aýrýlardy baqylaý ortalyǵynyń (ECDC) málimeti boıynsha, EO-da tseftrıaksonǵa tózimdilik sırek kezdesedi. Biraq azıtromıtsınge tózimdilik sońǵy jyldary artqan: bul 2022 jyly bakterııalardyń 25,6%-ynda anyqtalǵan.
Jańa preparat Innoviva Speciality Therapeutics kompanııasy men Global Antibiotic Research & Development Partnership (GARDP) uıymynyń jetekshiligimen memlekettik-jeke seriktestik aıasynda jasalǵan.
AQSh-taǵy Tamaq jáne dári-dármek sapasyn baqylaý basqarmasy (FDA) jaqyn kúnderi zolıflodatsındi maquldaýy kútilip otyr.
Eýropada bul dári ádettegi antıbıotık retinde emes, tek klınıkalyq synaqtarda nemese erte qoljetimdilik baǵdarlamalary aıasynda ǵana qoldanylady.
Budan buryn Eýropa elderinde óte qaýipti Trichophyton indotineae ınfektsııasy taralyp jatqany belgili boldy.