Bir suraq qoısańyz jetkilikti: Qazaqstanda AI kómekshisi iske qosyldy

ASTANA. KAZINFORM — Ulttyq statıstıka bıýrosy AI TALDAU kómekshisin iske qosty.

AQSh pen Qytaı jasandy ıntellekt qaýipsizdigi máselesinde kelissóz júrgizedi
Foto: Kazinform/Freepik

Endi qajetti statıstıkalyq derekterdi alý, óńirler kórsetkishterin salystyrý jáne olardyń serpinin taldaý jasandy ıntellekt kómegimen júzege asyrylady. QR SJRA Ulttyq statıstıka bıýrosy «Taldaý» jańartylǵan aqparattyq-taldamalyq júıesinde AI TALDAU ıntellektýaldy kómekshisin iske qosty.

AI TALDAU-dyń basty ereksheligi — statıstıkalyq aqparatty dıalog formatynda alý múmkindiginde. Paıdalanýshylarǵa qajetti kórsetkishterdi kóptegen kesteler men bólimderden óz betinshe izdeýdiń qajeti joq. Qajetti derekterdi alý úshin suraq qoıý jetkilikti.

Mysaly «Pavlodar oblysynda sońǵy bes jylda ortasha jalaqy qalaı ózgerdi?» nemese «Qazaqstan óńirleri boıynsha halyq sanyn salystyr» degen suraqtar qoıýǵa bolady. AI TALDAU tıisti kórsetkishterdi taýyp, derekterdi salystyrady, olardyń dınamıkasyn kórsetedi jáne negizgi úrdisterdi anyqtaýǵa kómektesedi.

Suraý nátıjesi kesteler, grafıkter, dıagrammalar jáne taldamalyq materıaldar túrinde usynylady. Qajet bolǵan jaǵdaıda paıdalanýshy suraǵyn naqtylap, tolyǵyraq aqparat ala alady.

Intellektýaldy kómekshi qazaq, orys jáne aǵylshyn tilderinde jumys jasaıdy. Daıyn materıaldardy PDF, Word, PowerPoint jáne Excel formattarynda saqtaýǵa bolady.

AI TALDAU-dy iske qosýmen qatar «Taldaý» júıesiniń ózi de jańartyldy. Júıeniń dızaıny men navıgatsııasy ózgertilip, derekterdi izdeý jáne taldaý quraldary jetildirildi.

Paıdalanýshylarǵa óńirler, kezeńder jáne basqa da taldamalyq parametrler boıynsha egjeı-tegjeıli statıstıkalyq aqparat qoljetimdi. Júıede kestelerdi óz betinshe qalyptastyrýǵa, grafıkter men dıagrammalar qurýǵa, kórsetkishterdi salystyrýǵa jáne nátıjelerdi jeke kabınette saqtaýǵa bolady. Sonymen qatar derekterdi odan ári óńdeý jáne taldamalyq júıelerde paıdalaný úshin mashına oqıtyn formattarda júkteý múmkindigi qarastyrylǵan.

— AI TALDAU kómegimen birneshe saǵat jumsap izdeıtin aqparatty endi birneshe sekýndta alýǵa bolady. Suraq qoısańyz jetkilikti, júıe jarııalanǵan resmı derekter negizinde jaýap usynady. Men bul jobany ulttyq statıstıkany damytýdyń perspektıvaly baǵyttarynyń biri dep sanaımyn. Biz resmı statıstıkanyń árbir adamǵa qoljetimdi ári túsinikti bolýyna, al tehnologııalardyń ýaqytty únemdeýge jáne sapaly aqparat negizinde sheshim qabyldaýǵa kómektesýine umtylýymyz kerek, — dep atap ótti Ulttyq statıstıka bıýrosynyń basshysy Maqsat Turlybaev.

Jańartylǵan «Taldaý» júıesi men AI TALDAU ıntellektýaldy kómekshisi azamattarǵa, kásipkerlerge, jýrnalısterge, zertteýshilerge, taldaýshylarǵa jáne memlekettik organdarǵa arnalǵan.

Osyǵan deıin Ulttyq statıstıka bıýrosy memlekettik organdar men kompanııalardyń derekterin, sondaı-aq jasandy ıntellekt múmkindikterin keńinen paıdalanýdy josparlap otyrǵanyn jazǵanbyz.