«Bir synypta 37-den astam bala»: Astanada 20 myńnan astam oqýshy orny jetispeıdi
ASTANA. KAZINFORM — Astanada halyq sany ósken saıyn mektepke baratyn balalar da kóbeıip jatyr. Sonyń saldarynan keı bilim ordalarynda oqýshy sany mekteptiń jobalyq qýatynan asyp ketken. Kazinform tilshisi elorda mektepterindegi jaǵdaıdy bilý úshin Astana qalasynyń Bilim basqarmasyna resmı saýal joldady.
Basqarma málimetinshe, 2026-2027 oqý jylynda elordada 209 jalpy bilim beretin mektep jumys isteıdi. Onyń 125-i — memlekettik, 77-si — jekemenshik, 7-eýi — respýblıkalyq mektep.
— Qazir qala mektepterinde 333 742 bala bilim alyp júr. Onyń basym bóligi — 282 891 oqýshy memlekettik mektepterde oqıdy. Jekemenshik bilim berý uıymdarynda — 44 252, respýblıkalyq mektepterde 6 599 bala bar, — delingen basqarma habarlamasynda.
Oqýshy kóbeıgen saıyn mekteptegi oryn máselesi de kúrdelene túsken. Bilim basqarmasynyń dereginshe, búginde Astanadaǵy 24 mektepte oryn jetispeıdi. Qala boıynsha 20 863 oqýshyǵa oryn qajet.
— Ásirese, № 84 jáne № 85 mektep-lıtseılerine túsetin salmaq joǵary. Eki mektep te 1 200 orynǵa eseptelgen. Alaıda № 84 mektepte qazir 2 938 bala oqysa, № 85 mekteptegi oqýshy sany 3 187-ge jetken. Eki mektep te eki aýysymmen jumys isteıdi. Bul mektepterde bir synypta orta eseppen tıisinshe 30 jáne 32 oqýshy oqıdy. № 84 mektepte orys tilinde oqytatyn bastaýysh býynnyń 10 synybynda jáne joǵary býynnyń 4 synybynda oqýshylar sany 35-ten asady. № 85 mektepte orys tilinde oqytatyn orta jáne joǵary býynnyń 5 synybynda oqýshylar sany 37-den asady, — delingen habarlamada.
Osylaısha, atalǵan qala mektepterindegi bala sany jobalyq qýatynan 2 eseden astam kóp ekenin baıqaýǵa bolady. Bilim basqarmasy muny oqý kabınetteriniń jáne osy synyptarǵa sabaq beretin muǵalimderdiń jetispeýimen baılanystyrady.
— Soǵan qaramastan, oqýshy sanynyń kóp bolýy oqý protsesin uıymdastyrýǵa jáne pedagogterdiń jumys júktemesine keri áser etpeıdi. Mektepter qajetti oqý quraldarymen, jabdyqtarmen jáne oqýshy sanyna saı jıhazben qamtylǵan, — delingen.
Aıta keteıik, buǵan deıin Astanada halyq sanynyń ósýine baılanysty jańa turǵyn aýdandar men áleýmettik nysandarǵa qajettilik artyp otyrǵany týraly jazǵan edik. Materıalda elordanyń aldaǵy jyldardaǵy damýy, qurylys qarqyndy júrip jatqan aýdandar jáne jańa bas josparda qarastyrylǵan ózgerister týraly aıtyldy.
