Bir preparattyń ártúrli dárihanadaǵy baǵasy 3-5 esege deıin ózgeredi - aýdıt

ASTANA. KAZINFORM — Búgin Parlament Májilisiniń jalpy otyrysynda depýtat Ashat Aımaǵambetov elimizde dári-dármektiń shekti baǵasyna qatysty problemany aıtty.

- Shekti baǵalardy qalyptastyrý kezindegi óreskel zań buzý anyqtaldy. Olardyń qatarynda shamadan tys marketıngtik jáne tasymaldaý shyǵyndaryn qosý baıqaldy. Preparattar tipti orıgınaldarynan da birneshe ese joǵary baǵamen satyp alynǵan.

Dárilerge qosylǵan ústeme baǵa zaýyttyq baǵadan 172 paıyzǵa deıin jetedi, al Eýropada jáne álemde 30 paıyzdan aspaıdy. 

Bir preparattyń ártúrli dárihanadaǵy baǵasy 3-5 esege deıin ózgeredi. Túpnusqanyń baǵasy 344 teńge bolsa, otandyq taýar óndirýshiniń (OTÓ) generıginiń baǵasy 1273 teńgeni quraǵan. Bul 4 esege deıin qymbat. Bul qalaı múmkin boldy? Otandyq zaýyt elde satylmaıtyn sheteldik analogtyń baǵasyn alyp, soǵan baılanystyryp, óz shyǵyndary men baǵasyn eseptep, solaı dáriniń baǵasy kóteriledi. Ony orıgınalmen salystyrsaq, kóptegen otandyq dáriler sheteldik túpnusqasynan eselep qymbat bolyp shyǵady, - dedi A. Aımaǵambetov.

Onyń aıtýynsha, «paratsetamoldyń» zaýyttyq baǵasy 59 teńge. Bul preparat Qyrǵyzstanda 90 teńge bolsa, al Qazaqstanda 144 teńgege satylyp jatyr.

- Salystyryńyzdar, «teraflıýge» elde belgilegen shekti baǵa 3,3 myń teńge, al zaýyttyq baǵasy 1,5 myń teńge, Reseıde - 2,2 myń teńge, Qyrǵyzstanda 2,5 myń teńge turady... Tipti, sumdyq jaǵdaı, dárihanalarda bıýdjet esebinen satyp alynǵan dáriler anyqtaldy, - dedi depýtat.

Budan buryn habarlanǵandaı, QR Joǵary aýdıtorlyq palatasynyń tóraǵasy Álıhan Smaıylov Qazaqstanda azamattardy dári-dármekpen qamtamasyz etý júıesine júrgizilgen memlekettik aýdıt nátıjesin jarııalady.

Sonymen qatar Májilisiniń jalpy otyrysynda depýtat Ashat Aımaǵambetov Qazaqstanda dárini tirkeý úshin óte kúrdeli bıýrokratııalyq rásimderden ótý kerek ekenin aıtyp, osy salany synǵa aldy.