Bir pedagogke – 4 shtat: Shymkenttegi 83 mektepte muǵalimderdiń júktemesi normadan asyp ketken

ShYMKENT. KAZINFORM – Shymkenttegi keıbir mektepterde pedagogterdiń aptalyq júktemesi 24 saǵat normasynan asyp, keıbiri 75 saǵatqa deıin jumys istegeni anyqtaldy.

Shymkent qalasy ákiminiń orynbasary Sársen Quranbektiń málimdeýinshe, Sana aqparattyq komponentin engizý barysynda pedagogterdiń zańnamada belgilengen normadan edáýir artyq júkteme alyp otyrǵany anyqtalǵan. 

Spıkerdiń aıtýynsha, eńbek kodeksine sáıkes, pedagogtiń aptalyq normatıvtik júktemesi – 16 saǵat, al bir jarym stavkamen jumys isteý barysynda júkteme 24 saǵattan aspaýy tıis. 

– Taldaý nátıjesinde keıbir pedagogterdiń 40-50-60 saǵatqa deıin, tipti 75 saǵatqa jýyq júkteme alǵany anyqtaldy. Máselen, 60 saǵattyq júkteme tórt shtattyq birlikke teń bolǵanymen, ony bir pedagogtiń atqaryp otyrǵan jaǵdaılary tirkelgen. Mundaı zań buzýshylyqtar Shymkent qalasyndaǵy 83 mektepte anyqtalyp, 1 286 pedagogtiń júktemesi belgilengen normadan asyp ketken, - dedi ákimdiktiń resmı ókili.

Sonymen qatar birqatar bilim berý uıymynda bir mezette eki shtattyq birlikti qatar atqarǵan qyzmetkerler de bar. 

– Mysaly, bir pedagog oqý isi jónindegi orynbasar bola otyryp, sol mekemede tárbıe isi jónindegi orynbasardyń da shtattyq birligin ıelengen. Bul jaǵdaı jumys ýaqytynyń naqty múmkindigine sáıkes kelmeıtinimen jáne eńbek zańnamasyna qaıshy ekenimen erekshelenedi, - dedi ol.

Spıkerdiń sózinshe, Oqý-aǵartý mınıstrligi, prokýratýra jáne eńbek ınspektsııasymen júrgizilgen talqylaý nátıjesinde pedagog júktemesiniń 24 saǵattan aspaýy tıis ekeni naqty aıqyndalǵan. 

– Osyǵan baılanysty mektep dırektorlaryna 1 qańtardan bastap pedagogterdiń júktemesi 24 saǵattan aspaýǵa tıis ekeni eskertildi. Bul sheshimniń 1 qańtardan bastap engizilýi bıýdjettik jospardyń jyl basynan bekitilýimen baılanysty bolyp otyr. Al shtattyq keste men tarıfıkatsııalyq birlikter jylyna eki ret – 1 qańtarda jáne 1 qyrkúıekte bekitiledi, - dedi qala ákiminiń orynbasary.

Budan buryn Shymkentte oqýshyny urǵan muǵalim qamaýǵa alynǵanyn jazǵan edik.