Bir palataly Parlamentke kóshý – zań shyǵarý tıimdiligin arttyrady – Aıdarbek Qojanazarov
ASTANA. KAZINFORM – Májilis depýtaty Aıdarbek Qojanazarov bir palataly Parlament – Quryltaıǵa kóshý zań shyǵarý úderisin ońtaılandyryp, qabyldanatyn sheshimderdiń tıimdiligin arttyratynyn aıtty.
– 145 depýtattan turatyn bir palataly Parlament jaǵdaıynda zańdar uzaq talqylaýlarsyz, jedel qabyldanady. Bul Parlament músheleriniń jaýapkershiligin kúsheıtip, sheshimderdiń ýaqytyly ári naqty bekitilýin qamtamasyz etedi. Nátıjesinde demokratııalyq ınstıtýttardyń tıimdiligi artady, - dedi depýtat.
Sondaı-aq proportsıonaldyq saılaý júıesi partııalardy nyǵaıtyp, saıası básekelestikti damytýǵa jáne qoǵam múddesin naqty jetkizetin saıası júıe qalyptastyrýǵa baǵyttalǵan. Bul bızneske qolaıly orta quryp, mektepter men aýrýhanalar salý, ınfraqurylymdy jaqsartý sııaqty mańyzdy bastamalarǵa qajet zańdardyń jedel qabyldanýyna múmkindik beredi.
Aıdarbek Qojanazarov bıliktiń halyq aldyndaǵy ashyqtyǵy artyp, tsıfrlyq tehnologııalar arqyly esep berý mádenıeti kúsheıetinin atap ótti. Onyń aıtýynsha, reformalar bızneske qatysty zańdar men talaptardyń turaqty ári túsinikti bolýyn qamtamasyz etip, kásipti uzaq merzimge josparlaýǵa jol ashady.
Depýtat el bolashaǵyna qatysty pikirin ashyq bildirgen myńdaǵan qazaqstandyqtyń únin eskere otyryp, «Halyq keńesi» ıdeıasy qalyptasqanyn aıtty. Bul «estıtin memleket» qaǵıdatynyń naqty iske asyp jatqanyn kórsetedi.
– Osyndaı reformalar jas urpaqtyń alańsyz bolashaǵy úshin qolǵa alynyp otyr. Ekonomıkanyń zamanaýı talaptarǵa saı damýy, jańa múmkindikterdiń paıda bolýy jastardyń bilimin, qabiletin el ishinde júzege asyrýyn qamtamasyz etedi. Osylaısha, daryndy jastar óz bolashaǵyn shetelde emes, Qazaqstanda jasaıdy, - dedi ol.
Buǵan deıin «Aq jol» partııasy azamattar men bıznestiń jekemenshik quqyǵyn qorǵaýdy kúsheıtýdi usyndy.
