Bir palataly Parlament týraly bastamany halyq qoldap otyr — Prezıdent

QYZYLORDA. KAZINFORM — Bul týraly Memleket basshysy Qasym-Jomart Toqaev Qyzylorda qalasynda ótip jatqan Ulttyq quryltaıdyń V otyrysynda aıtty.

— Bir palataly Parlamentke kóshý týraly bastamany halyq qoldap otyr desek, eshqandaı qate bolmas. Qoǵamdyq pikirdi bilý úshin turaqty túrde júrgizilgen saýalnamalar jáne jumys tobynyń qorytyndysy da osy paıymǵa kelip toǵysady. Depýtattar men partııa fraktsııalarynyń jetekshileri jaqynda aımaqtardy aralap, saılaýshylarmen kezdesip qaıtty. Olar halyqtyń osy bastamadan habardar ekenin jáne reformany qoldap otyrǵanyn aıtyp jatyr. Bul jerde qandaı da bir pikir qaıshylyǵy joq. Jalpy baǵyt-baǵdarymyz — aıqyn, — dedi Qasym-Jomart Toqaev.

Osy oraıda Prezıdent aldaǵy ózgeristerge qatysty ortaq mámile bar ekenin aıtty.

— Jumys toby barlyǵyn jan-jaqty saraptaı otyryp, naqty paıymdary men usynystaryn ortaǵa saldy. Negizgi pikirtalas «Jańa Parlament qandaı bolady, neshe depýtattan turady? Qurylymy qandaı bolady jáne qalaı jumys isteıdi?» degen saýaldar jóninde órbidi. Bul tereń zerdelep, jan-jaqty saraptap, ólshep, baıyppen túpkilikti sheshim qabyldaıtyn asa mańyzdy, tipti, sheshýshi másele boldy der edim, — dedi Memleket basshysy.

Parlament reformasy aıasynda áıelderdiń 30% kvotasyn saqtap qalý usynylǵany týraly jazdyq.