Bir palataly Parlament partııalardyń rólin kúsheıtedi — depýtat

ASTANA. KAZINFORM — Bir palataly Parlament — Quryltaı Qazaqstandaǵy partııalyq qurylymdy tıimdi etýge yqpal etedi. Bul týraly Májilistiń Halyqaralyq ister, qorǵanys jáne qaýipsizdik komıtetiniń tóraıymy Aıgúl Quspan Jibek Joly telearnasyndaǵy «Ýáde» baǵdarlamasynda aıtty.

— Meniń oıymsha, depýtattary tek proportsıonaldy júıe boıynsha saılanatyn bir palataly Parlament saıası partııalardy aıtarlyqtaı kúsheıtedi, — dedi Aıgúl Quspan.

Depýtat atap ótkendeı, keıingi jyldary Qazaqstanda partııalyq qurylys álsiz boldy. Keıbir partııalar ishki kelispeýshilikter men bytyrańqylyqqa ushyrap, bul olardyń turaqtylyǵyna keri áserin tıgizdi.

Sonymen qatar, spıker AMANAT pen «Aq jol» partııalarynan basqa saıası partııalardyń salystyrmaly túrde «jas» ekenin jáne aımaqtarda jetkilikti ókildikke ıe emestigin atap ótti.

Aıgúl Quspannyń pikirinshe, eger Parlament proportsıonaldy júıe boıynsha qurylsa, partııalar ózderiniń aımaqtyq qurylymdaryn kúsheıtedi, qoldaýshylaryn kóbeıtedi jáne zań shyǵarýshy organǵa ótý úshin básekege qabilettiligin arttyrady.

Depýtat sondaı-aq Parlamentte partııalardyń keńirek ókildigi ıdeıasyna qoldaý bildirdi.

Aıta keteıik, qazaqstandyqtar 15 naýryzdaǵy referendýmda jańa Konstıtýtsııa jobasyn qoldasa, elde bir palataly Parlament – Quryltaı óz jumysyn bastaıdy. Jańa ókildi organnyń depýtattary qazirgi Parlament ǵımaratynda jumys isteı me? Kazinform tilshisi anyqtap kórdi.