Bir palataly parlament qurý jańa saıası mádenıettiń negizin qalaıdy – Álıhan Báımenov

ASTANA. KAZINFORM – Endi Qazaqstanda jańa saıası mádenıet qalyptasýy kerek. «Prezıdent Joldaýy: Qazaqstan damýynyń aldaǵy baǵyttary» taqyrybynda ótken otyrysta Astana memlekettik qyzmet haby Basqarýshy komıtetiniń tóraǵasy Álıhan Báımenov osyndaı pikir bildirdi.

Ol parlamenttegi spıkerler men Joǵarǵy sot tóraǵasyna qatysty qalyptasqan stereotıpten arylý qajet ekenin aıtty.

– Bizde 1995 jyldan bastap depýtattar men sottar spıkerler men sot tóraǵalarynyń qaramaǵyndaǵy adam degen túsinik qalyptasty. Al shynynda, spıker depýtattardyń basshysy emes. Spıker – otyrysty, jumysty retteýshi adam. Joǵarǵy sot tóraǵasy da sottardyń basshysy emes. Sottar tek zańǵa baǵynýy kerek. Mine, osy mádenıetti jańasha qalyptastyrý qajet, – deıdi Astana memlekettik qyzmet haby Basqarýshy komıtetiniń tóraǵasy.

Álıhan Báımenov Prezıdenttiń 1 jyldan keıin bir palataly parlament qurý týraly usynysy osy saıası mádenıettiń negizin qalyptastyrýǵa járdem etetinin aıtty.

– Prezıdent joldaýynda 1 jyldan keıin ǵana ózgeris bolatynyn aıtýy jańa mádenıetti qalyptastyrýǵa múmkindik beredi. Elimizde tuńǵysh ret osyndaı kúrdeli ózgeris aldyn ala jarııalanyp jatyr. Ádette damyǵan elderde bılik ókilderi «men bul laýazymnan ketemin» dep jarty jyl buryn aıtyp qoıady. Bizde mundaı eshqashan bolǵan emes. Al endi 1 jyldan keıin tutas ınstıtýt taraýy múmkin. Osy tusta jańa saıası mádenıettiń de negizderi qalaný kerek, – dedi ol.

Aıta keteıik, kúni keshe Prezıdent bir palataly Parlament qurý týraly bastama kóterdi.