Bir palataly Quryltaıǵa kimder kvota boıynsha kire alady

ASTANA. KAZINFORM – Memlekettik keńesshi - Konstıtýtsııalyq komıssııa tóraǵasynyń orynbasary Erlan Qarın Konstıtýtsııalyq reforma jónindegi komıssııanyń birinshi otyrysynda bir palataly Quryltaıǵa kimder kvota boıynsha kire alatynyn aıtty.

- Parlamenttegi kvotalar týraly Prezıdent Ulttyq quryltaı otyrysynda egjeı-tegjeıli baıandady. Memleket basshysy aıtqandaı, «prezıdenttik kvota» degen bolmaıdy. Qasym-Jomart Kemeluly Ulttyq quryltaıdyń otyrysynda «Depýtattardyń ishinde arnaıy taǵaıyndalǵan «tańdaýly tulǵalar» bolmaýy kerek. Olar bárine birdeı, ortaq tártippen saılanýǵa tıis» dedi. Mundaı qadam bolashaq Quryltaıdyń quramyn jasaqtaǵanda bárine birdeı múmkindik berilýin qamtamasyz etedi. Al áıelderge, jastarǵa jáne múmkindigi shekteýli jandarǵa arnalǵan partııalyq kvota saqtalady. Sebebi bul – Parlamenttik emes, partııalyq tizimdegi kvota. Munyń barlyǵy konstıtýtsııalyq zańdar deńgeıinde sheshiletin máseleler, - dedi Memlekettik keńesshi.

Konstıtýtsııalyq komıssııa tóraǵasynyń orynbasary Konstıtýtsııanyń 47-babynda qamtylǵan barlyq rásimderdi bolashaq Quryltaı modelinde saqtalatynyn aıtty.

- Bul – tepe-teńdik tejemelik mehanızmderin saqtaýǵa múmkindik beretin qadam. Sondyqtan, qazirgi konstıtýtsııalyq rásimder men daýys berýdiń ara qatynasyn Quryltaı modeline beıimdeı otyryp saqtap qalý usynyldy, - dedi ol.

Aıta keteıik, Jibek Joly arnasy Konstıtýtsııalyq reforma jónindegi komıssııanyń birinshi otyrysyn tikeleı efırde kórsetip jatyr.

Buǵan deıin Konstıtýtsııalyq komıssııanyń quramynda kimder kirgenin jazǵan edik.