Bir palataly Quryltaıǵa qazirgi 6 partııa ǵana kirse, qoǵam bizdi túsinbeıdi — Ermurat Bapı

ASTANA. KAZINFORM — Májilis depýtaty Ermurat Bapı «Referendým-2026» atty onlaın-marafonda jańa Konstıtýtsııa jobasy qabyldansa, eldegi saıası partııalardyń sany artý kerek degen paıym aıtty.

— Osy kúzde keledi dep otyrǵan Quryltaıymyzda qazirgi Májilistegi alty partııa sol qalpynda baratyn bolsa, onda qoǵam bizdi túsinbeıdi. Beınelep aıtqanda, «buzaýdyń ornyna tulyp usyndyńdar» ǵoı degen túsinik bolady. Sondyqtan saılaýǵa daıyndyq barysynda partııalar birigýi múmkin, áldebir konstrýktsııalar jasalady, jańa partııalar paıda bolýy múmkin dep oılaımyn. Qyzylorda quryltaıynda qoǵamdy partııalyq ınstıtýttar negizinde biriktirý bastamasy aıtyldy. Azamattar óziniń saıası ustanymyna saı keletin partııalarǵa múshe bolý arqyly ortaq ıdeıaǵa, memlekettik múddelerge jumylý múmkindigi kúsheıedi dep oılaımyn, — dedi Ermurat Bapı.

Sondaı-aq, ol jańa Konstıtýtsııa jobasynda Parlament bir palataly Quryltaıǵa berilgen ókilettikter týraly pikir bildirdi.

— Jeke oıymdy aıtsam, 100 paıyz kóńilim tolady dep aıta almaımyn. Biraq bul eldiń damýyna, bolashaqtyń qaýipsizdigin qamtamasyz etýge, Táýelsizdik pen Egemendikke kepil bolýǵa arnalǵan Konstıtýtsııa bolǵandyqtan men ony azamattyq turǵyda, perzenttik paryz turǵysynan qoldaımyn. Bul úlken táýekelderdiń aldyndaǵy daıyndyqtyń qamy bolǵandyqtan azamattyq janashyrlyqpen qaraýymyz kerek. Bul jerde ary-beri tartyp, qoǵam men bıliktiń arasynda yryń-jyryń týatyndaı jaǵdaı dál qazirgi álemde qajet emes, — dedi depýtat.

Aıta keteıik, Kazinform agenttiginiń YouTube arnasynda «Referendým-2026» atty onlaın-marafonyn tikeleı efırde kórsetip jatyr. Saǵat 12:00–de bastalǵan onlaın-marafon saǵat 18:00–ge deıin jalǵasady dep josparlanǵan.