Bir palataly Quryltaıǵa aýysý — saıası júıeni jańǵyrtýdy bildiredi — sheteldik dıplomat
ASTANA. KAZINFORM — Búgin elordada Halyqaralyq baıqaýshylarǵa járdemdesý ortalyǵyndaǵy baspasóz máslıhatynda Qazaqstanda akkredıttelgen dıplomatııalyq korpýs saılaý potsesine qatysty pikirin aıtty.
Palestına Memleketiniń Qazaqstandaǵy elshisi, dıplomatııalyq korpýs dýaıeni Montaser Abý Zeıdtiń aıtýynsha, baıqaýshy retinde osymen altynshy ret qatysyp otyr.
— Búgingi saılaýǵa toqtalsaq, biz tańerteńnen beri birqatar saılaý ýchaskesin araladyq. Eshqandaı zań buzý derekteri tirkelgen joq. Azamattar eshqandaı qysymsyz, óz erkimen jáne kóterińki kóńil-kúımen daýys berip jatyr. Men Qazaqstan halqyn jáne Prezıdent Qasym-Jomart Toqaevty osy demokratııalyq Quryltaı depýtattaryn saılaýmen quttyqtaı otyryp, Qazaqstan halqyna beıbitshilik, qaýipsizdik jáne turaqtylyq tileımin, — dedi Palestına elshisi.
Óz kezeginde Túrkııanyń Qazaqstandaǵy Tótenshe jáne ókiletti elshisi Mustafa Kapýdjý 2026 jylǵy 15 naýryzda ótken referendýmda qabyldanǵan jańa Konstıtýtsııa negizinde júzege asyrylyp jatqan osyndaı tarıhı oqıǵaǵa qatysý úlken mártebe ekenin atap ótti.
— Qazaqstan Prezıdenti Qasym-Jomart Kemeluly Toqaevtyń kóshbasshylyǵymen elde aýqymdy saıası reformalar iske asyp jatyr. Bir palataly Quryltaıǵa aýysý — saıası júıeni jańǵyrtýdy bildiredi. Bul jaı ǵana sımvoldyq qadam emes. «Quryltaı» sóziniń ózi — túrki álemindegi mańyzdy memlekettik máseleler talqylanatyn alqaly jıyndy bildiretin dástúrli ataý. Sondyqtan Qazaqstan Respýblıkasynyń jańa Konstıtýtsııasy aıasynda jáne onyń negizinde ótkizilip otyrǵan búgingi saılaý — tarıhı oqıǵa, — dedi Túrkııa elshisi.
Sonymen qatar ol búgingi saılaý barysynda daýys berý zań talaptaryna sáıkes júrip jatqanyn aıtty. Bul protseske baıqaýshy retinde kóptegen halyqaralyq uıym tartylyp, barlyǵy ashyq ótip jatyr.
Budan bólek, Indonezııanyń Qazaqstandaǵy Tótenshe jáne ókiletti elshisi Rahman Mohamad Fadjroeldiń sózine qaraǵanda, ol ózi tańerteńnen beri úsh saılaý ýchaskesine barǵan.
— Bul saılaý ýchaskelerinde daýys bergen adamdarǵa, komıssııa múshelerine jáne saıası partııalardyń ókilderine suraqtar qoıdym. Máselen, Qazaqstandaǵy demokratııa men saılaýdyń halyqaralyq standarttarynyń, ıaǵnı tańdaý erkindigi men erkin daýys berýge qatysty qaǵıdalar jóninde saýal qoıdym. Bul rette barlyǵy zań talaptaryna saı ótip jatyr dep jaýap berdi. Osy oraıda erkin ári ádil saılaý jónindegi halyqaralyq standarttardy ustanǵany úshin Qazaqstandy quttyqtaǵym keledi. Osylaısha, Qazaqstan búkil álemge óziniń demokratııalyq memleket ekenin aıqyn kórsetip otyr, — dedi Indonezııa elshisi.
Búgin elimizdiń barlyq óńirinde Quryltaı depýtattaryn saılaý bastaldy. Daýys berý 10 423 saılaý ýchaskesinde ótedi.
