Bir palataly Quryltaı zań qabyldaý merzimin qysqartady — Maksım Rojın
ASTANA. KAZINFORM — Bir palataly Quryltaıdyń qurylýy zań qabyldaý merzimin qysqartyp, ýaqyt pen qarjy shyǵynyn azaıtýǵa múmkindik beredi. Bul týraly jýrnalıst Maksım Rojın Jibek Joly telearnasynyń «Búgin LIVE» baǵdarlamasynda aıtty.
Onyń aıtýynsha, Parlament sońǵy birneshe aıda Quryltaı jáne onyń depýtattarynyń mártebesine qatysty konstıtýtsııalyq zań qabyldaǵan.
— Bul zańnyń ishinde qazirgi Parlamenttiń jumys tájirıbesiniń basym bóligi saqtalǵan. Biraq eń mańyzdysy — Quryltaıdyń qandaı qaǵıdattarmen jumys isteıtini jáne depýtattardyń zańdardy qandaı qaǵıdattar boıynsha qabyldaıtyny kórsetilgen, — dedi Maksım Rojın.
Onyń sózinshe, jańa zańdaǵy mańyzdy máselelerdiń biri — Quryltaı qaraıtyn zańdardyń bir bóliginiń Halyq keńesiniń usynystary negizinde qaralýy.
— Aldaǵy ýaqytta Quryltaı qaraıtyn zańdardyń bir bóligi Halyq keńesiniń usynystary negizinde bolýy múmkin, ıaǵnı Halyq keńesiniń qosymsha múmkindigi tek aqyldasyp, usynys berýmen ǵana shektelmeıdi. Quryltaı Halyq keńesi usynǵan máselelerdi zań júzinde qaraýǵa múmkindik alady, — dedi ol.
Maksım Rojınniń aıtýynsha, bir palataly Quryltaı ýaqyt pen qarjy shyǵynyn edáýir azaıtady.
— Eki palataly Parlamentpen salystyrǵanda bir palataly parlamenttiń ýaqyt shyǵyny da, qarjy shyǵyny da ózgeshe bolady. Mysaly, áskerı-patrıottyq tárbıe týraly zań Májiliste ǵana eki jarym jyl qaraldy. Ár baby talqylanyp, ár depýtat óz usynysyn engizdi. Keıin dál sondaı jumys Senatta qaıta júrgizildi. Májilistegi jeti komıtettiń qorytyndysynan keıin dál sondaı jeti qorytyndy Senatta qaıta qaralady. Munyń bári ýaqyt pen qarjyny talap etedi, — dedi ol.
Rojın Quryltaıdyń bir palataly bolyp qurylýy jáne konstıtýtsııalyq zańda belgilengen qaǵıdattar boıynsha jumys isteýi halyqqa reformalardy jyldamyraq jetkizýge múmkindik beretinin aıtty.
— Osy shyǵynnyń bári Quryltaıda eki ese azaıady. Sonyń nátıjesinde zańdar tez qabyldanyp, ýaqyt pen qarjy shyǵyny azaıady. Quryltaıdyń bir palataly bolyp qurylýy jáne konstıtýtsııalyq zańda belgilengen qaǵıdattar boıynsha jumys isteýi halyqqa reformalardy jyldamyraq jetkizýge múmkindik beredi. Qabyldanatyn zańdar jyldam ári sapaly qabyldanady jáne oǵan eki ese az shyǵyn jumsalady, — dedi Maksım Rojın.
Aıta keteıik, buǵan deıin jańa Konstıtýtsııa jobasynda Halyq keńesine zańnamalyq bastama kóterý jáne respýblıkalyq referendým ótkizýdi usyný quqyǵy beriletini týraly jazǵanbyz.
