Bir otbasynyń ólimi: eki múrde tabylǵan úıdiń ıesine jaldaý aqysy beıtanys adamnan túsip otyrǵan
ATYRAÝ. KAZINFORM – Qyzylqoǵa aýdanynda ata-enesin, al Atyraý qalasynda áıeliniń baýyrlaryn óltirdi degen kúdikke ilingen Sultan Sársemalıevke qatysty sot protsesi jalǵasyp jatyr. Kezekti otyrysta birneshe kýá jaýap berdi.
Sot otyrysynda kúdiktige Munaıshy yqshamaýdanyndaǵy úıin jalǵa bergen azamat kýálik etti. Onyń aıtýynsha, otbasy atalǵan baspanany 2023 jyldan beri jaldap turǵan.
Kýágerdiń sózinshe, aı saıynǵy 50 myń teńge kólemindegi jaldaý aqysy belgisiz azamattan Kaspi Gold arqyly túsip otyrǵan. Alaıda belgili bir kezeńderde otbasy úıdi jaldamaı qalǵan.
Sotta kýá bolǵan úı ıesi ótken jyldyń 7 jeltoqsanynda úı ıesi Sultan Sarsemalıevpen habarlasqan. Sol kezde kúdikti áıelin emdetip júrgenin aıtyp, endi úıdi jaldamaıtynyn jetkizgen.
Іsti qarap jatqan sýdıa Zarema Hamıdýllına kýágerdiń tergeý barysynda bergen túsiniktemesin oqyp berdi.
– Men úıge qajet bolǵan kezde ǵana baryp júrdim. Áıelin bir-aq ret kórdim, onyń ózinde syrtynan ǵana baıqadym. Balalaryn múlde kórgen emespin. Áıeli oramalda edi. Shamamen 27 jeltoqsanda úıge baryp, esik aldyndaǵy tastyń astynda turǵan kiltterdi aldym. Úıdiń ishin qaraǵanda eshqandaı shashylǵan zattar nemese daqtar baıqalmady. Úıdi tazalap ketkenin kórdim, – delingen kýágerdiń jaýabynda.
Sondaı-aq úı ıesi sotta máıitti oraýǵa paıdalanylǵan kilemniń ózine tıesili emes ekenin aıtty. Onyń sózinshe, aýladaǵy dýshtyń ishinde eki kúrek pen bir aıyr turǵan.
Budan bólek, sotta Sultan Sarsemalıevtiń jezdesi de jaýap berdi. Ol baldyzynyń tuıyq minezdi bolǵanyn jáne otbasyn oılap júretinin aıtty. Alaıda kýáger olardyń arasyndaǵy qarym-qatynas jaqsy bolǵanymen, Sársemalıevpen ajyrasýdyń naqty sebebi jáne otbasyndaǵy túıtkilder týraly sóılespegen.
Jalpy sotqa deıingi tergeý kezinde kúdiktiniń 2 advokaty bolǵan. Qazir Sultan Sársemalıevti bireýi qorǵap jatyr. Advokat Asan Jumabaev sottalýshyny qazir kináli dep aıtýǵa erte deıdi.
- Advokat áleýmettik kómek retinde, qoǵamdyq , qaıyrymdylyq negizde tegin kómek kórsete alady. Men qazir aqysyz qyzmet kórsetip otyrmyn. Bul boıynsha týysqandarymen jasalǵan kelisimshart bar, - dep pikir bildirdi kúdiktiniń qorǵaýshysy.
Búgingi sot otyrysyna qalǵan eki kýá qatyspady. Olardy kelesi protseske qatystyrý mindeti polıtsııa departamenti men prokýratýra ókilderine júkteldi. 24 kýániń basym bóligi sot zalyna kelip bilgenin aıtsa, keıbiri onlaın qosyldy.
Aıta keteıik, kelesi sot otyrysy 4 maýsymǵa belgilendi.
Kúdikti 2024 jyly kásipkerlik nysandardyń birinde jaldamaly jumysshy bolyp, jer qazyp, qoqys shyǵarǵan. Sultan men jumys bergen kásipker bir yqshamaýdanda turǵan. Ara-tura bir-birin kórgennen keıin aǵa-ini bolyp aralasqan. Kýá sol kezde Sultan Sársemalıevtiń qara jumysqa ıkemdi, qoly mashyqtanǵan, jerdi jalǵyz ózi qazatyn qaıratty ekenin aıtqan.
Buǵan deıin negizgi sot otyrysynda aıyptalýshy Sultan Sársemalıev sotta qaıynaǵasy Naýryz Muqanǵalıevti qasaqana emes, ózin-ózi qorǵaý maqsatynda óltirgenin málimdedi.
Qylmystyq iske Atyraý oblysynyń qylmystyq ister jónindegi mamandandyrylǵan aýdanaralyq sotynyń sýdıasy Zarema Hamıdýllına tórelik etýde.
18 mamyr kúni aldyn ala sot otyrysy ótti.
Sol kezde Sultan Sársemalıev isti alqa bılerge berýden bas tartty.
Sot otyrysy kezinde memlekettik aıyptaýshy da, aıyptalýshy da qylmysqa otbasylyq janjal sebep bolǵanyn aıtty. Tergeý barysynda Sultan Sársemalıev Naýryz Muqanǵalıevti mamyr aıynda ózi qalada jalǵa alǵan úıinde óltirip, úı irgesine kómip tastaǵany belgili bolǵan.
Al qarasha aıynda kúdikti bir pyshaqpen úsh adamdy óltirgen. Jangeldın aýylyna barǵan kezde ata-enesi Maqsot Qarabalın men Násip Óteshqalıevany óltirip, saraı ishine kómip ketken. Al. Meıramgúl Qarabalınany Atyraýda ýaqytsha turyp jatqan úıine ákelip, pyshaq jaraqatyn salǵan. Saldarynan ol da kóz jumdy.
Buǵan deıin marqumdardyń qyzy men baýyry bolyp esepteletin Aqbaıan Muqanǵalıevanyń adam óltirý faktisine qatysy joq ekeni belgili boldy.
Eske salsaq, Jangeldın aýylynda turatyn otbasy 2025 jyldyń sońyna belgisiz jaǵdaıda joǵalyp ketken edi.
6 qańtarda Atyraý oblysy aýmaǵynan joǵalǵan otbasynyń eki múshesiniń — otaǵasy Maqsot Qarabalın men onyń jubaıy Násip Óteshqalıevanyń denesi saraıdan tabyldy.
Keıin olardyń denelerinde pyshaq izderi bary belgili boldy.
9 qańtarda Atyraý oblysynda otbasy múshelerin óltirdi degen kúdikke ilingen marqumdardyń kúıeý balasy Sultan Sarsemalıev ekeni resmı túrde belgili boldy.
Sondaı aq joǵalǵan otbasy týraly tyń derekterdi áleýmettik jeli arqyly taratqan hakerge halyqaralyq izdeý jarııalanǵan edi.
Aqpan aıynyń basynda kúdiktiń 5 balasy memleket qamqorlyǵyna alyndy.
Aqpan aıynyń sońynda kúdikti men marqumdardyń jaqyny bolyp esepteletin Aqbaıan Muqanǵalıeva Indonezııada ustaldy.
Eki kúdiktiniń shetelde qalaı ustalǵany jóninde vıdeo jarııalandy.
Birneshe kúnnen keıin olar Atyraý qalasyna jetkizildi.
Keıin polıtsııa Atyraý oblysy Jangeldın aýylynda bútin bir otbasyny óltirdi degen kúdikke ilingen Sultan Sarsemalıevti ata-enesin óltirgen úıge apardy. Ol tergeýshilerge qylmysty qalaı jasaǵanyn kórsetip, suraqtarǵa jaýap bergen.
Іshki ister mınıstrligi jarııalaǵan vıdeodan Sultan Sársemalıevtiń qalada jaldap turǵan úıiniń irgesinen qazǵan shuńqyrdy kórsetkenin baıqaýǵa bolady.
Ol sot sanktsııasymen 2 aıǵa qamaýǵa alynǵan edi.
Sultan Sarsemalıevke júrgizilgen psıhıkalyq saraptamanyń nátıjesinde onyń aqyl-esi durys ekeni belgili boldy.
