Bir otbasy sheteldegi demalysqa qansha shyǵyndaıdy
ASTANA. KAZINFORM — Jazda týrızm salasy qarbalasqa toly bolady. Suranys artady, sáıkesinshe baǵa da ósedi. Qazaqstandaǵy iri týroperatorlardyń usynysyn taldaý kezinde tórt adamnan turatyn bir otbasynyń (eki eresek jáne eki bala) 7 túndik týr quny anyqtaldy. Kazinform tilshisi Almaty qalasynan shyǵatyn týr baǵasyn saralady.
Týrmarshrýt baǵasyn eseptegende eń arzan usynys tańdaldy. Bul somaǵa áýe bıleti men qonaqúıde turý qyzmeti kiredi. Sonymen birge tek tańǵy as esepteldi. Eger úsh mezgil ystyq tamaq kirse, baǵasy óse túsedi. Otbasylyq demalys baǵyttarynyń reıtıngi (eń arzany men eń qymbaty) mynadaı:
Grýzııa (850 myń teńgeden bastap) — eń qoljetimdi baǵyt. Bul el jaqyn, sáıkesinshe ushý ýaqyty qysqa. Ári tikeleı reıster kóp jáne arzan baspana jetkilikti. Alaıda týrıster tamaqtaný shyǵynyn ózderi kóteredi.
Mysyr (920 myń teńgeden bastap) men Túrkııa (990 myń teńgeden bastap) — qazaqstandyqtar arasynda eń tanymal charterlik baǵyttardyń biri. Arzanynyń ózinde «bári qosylǵan» qyzmeti bolýy múmkin. Biraq jatyn oryn teńizden alystaý ornalasqan úsh juldyzdy qonaqúı bolady. Otbasylyq demalysqa qolaıly bes juldyzdy qonaqúı men sapaly All Inclusive júıesin tańdasańyz joldamanyń quny shamamen 1,5–2 ese ósedi.
Vetnam (1,05 mln teńgeden bastap) men Taıland (1,15 mln teńgeden bastap) — alys ári tasymal quny joǵary baǵyttar, ıaǵnı qazaqstandyqtar úshin Taıaý Shyǵys sapary qymbatyraq. Negizi týrtoptamaǵa tek tańǵy as kiredi. Sondyqtan túski jáne keshki asty týrıster ózderi tóleıdi.
Maldıv araldary (2 mln teńgeden bastap) jáne Balı (2,35 mln teńgeden bastap) — eń qymbat ári premıým sanatyndaǵy kýrort. Tórt adamǵa arnalǵan áýe bıleti (Balıǵa kóbine birneshe ret aýysyp ushýǵa týra keledi) jalpy bıýdjettiń 70 paıyzyn quraýy da múmkin. Maldıv araldaryna tek tańǵy as qarastyrylǵan kezde qonaqúı aýmaǵyndaǵy qymbat meıramhanalarǵa qosymsha aqy tóleýge týra keledi. Bul kezde jalpy shyǵyn eki esege deıin artyp ketedi.
Joldamanyń baǵasy balalardyń jasyna qaraı ózgerip otyrady. Kóptegen qonaqúıde 6–12 jasqa deıingi balalarǵa jeńildik usynady. Al eger balalar jasóspirim bolsa, olar eresekter sııaqty tolyq týrmarshrýt baǵasyn alady, ıaǵnı sapar quny edáýir qymbattaýy múmkin.
Sonymen qatar, arzan týrdy tańdaǵan otbasy qosymsha shyǵynǵa daıyn bolýy kerek. Olardyń qatarynda áýejaıdan qonaqúıge deıingi tasymal, mindetti medıtsınalyq saqtandyrý, kýrorttyq tólem (Balı men Maldıv araldarynda), sondaı-aq oıyn-saýyqqa jumsalatyn aqsha bar.
Sarapshylar shyǵyndy azaıtý úshin joldamany birneshe aı buryn erte brondaýǵa keńes beredi. Sebebi shilde-tamyz aılarynda otbasylyq arzan joldama tabý qıyn. Keıde baǵasyn kúrt arzandatyp usynady. Mundaıda qolaıly nómirler eń aldymen satylyp ketedi.
Aıta keteıik, bul baǵa maýsym aıynda esepteldi. Valıýta baǵamy men áýe kompanııalarynyń tarıfi de joldamanyń jalpy qunyna tikeleı áser etedi.
Eske salsaq, qazir ishki týrızmge de suranysqa joǵary. Byltyr Qazaqstandaǵy ornalastyrý oryndarynyń sany 4 482-ge jetti, al olardyń jalpy syıymdylyǵy 232 myńnan astam tósek-oryndy qurady.
